Ne të gjithë kemi një mik që, pas ndonjë padrejtësie të madhe, poston: “Do ta marrë karma hakun… por kur? Po pres!” Edhe ti mund të jesh ky mik. Vitet e fundit, shumë njerëz ndihen sikur drejtësia kozmike është me vonesë, veçanërisht kur njerëz të padëshiruar kalojnë nga një skandal në tjetrin, pa iu hyrë gjemb në këmbë. Por ja ku qëndron problemi: ideja jonë për karmën është komplet e gabuar.

Karma nuk është hakmarrje “kozmike”. Nuk është një sistem shpërblimi për njerëzit e mirë dhe ndëshkimi për ata të këqij. Nuk funksionon si ndonjë magji që zgjidh automatikisht padrejtësitë e botës. Në fakt, karma është shumë më e thjeshtë (dhe më komplekse) se kaq. Bëhet fjalë për shkakun dhe pasojën: çdo veprim që bëjmë ka ndikim, te ne dhe te të tjerët. Këto ndikime krijojnë një zinxhir rezultatesh dhe zgjedhjesh të reja. Nëse je i sjellshëm, në përgjithësi, jeta jote do të jetë më e qetë - por nuk ka garanci absolute.

Një shembull që vlen për t’u marrë është ai i Jarvis Jay Masters, një autor budist që ka kaluar mbi 34 vite në rreshtin e vdekjes për një krim që thotë se nuk e ka kryer. Në një ambient të mbushur me dhunë dhe agresivitet, ai ka zgjedhur paqen. Kur rojet e burgut e ngacmojnë, ai nuk hakmerret, sepse e di që nëse shpërthen, ai zemërim mund të kalojë te një fëmijë i pafajshëm kur roja të shkojë në shtëpi. Masters ka bërë një zgjedhje të thjeshtë për të mos përhapur më shumë dhunë në botë. Ai nuk është i lirë, por është më i qetë. Dhe zgjedhja e tij e ka bërë botën më të mirë për fëmijët e rojeve dhe për njerëzit që kanë lexuar historinë e tij.

Çfarë mund të mësojmë nga kjo? Së pari, karma është e ndërlidhur me çdo veprim tonin. Çdo gjë që bëjmë, edhe më e vogla, ka një efekt. Dhe duke ndryshuar mënyrën si veprojmë, ne ndryshojmë edhe veten. Kur përqendrohemi në karmën e të tjerëve, duke pritur që universi t’i ndëshkojë për gabimet e tyre, vetëm sa e rëndojmë veten me zemërim dhe stres. Në vend të kësaj, përqendrohu te veprimet e tua dhe ndikimi që ato kanë. Ndoshta nuk do të shohësh ndryshim të menjëhershëm në botën e jashtme, por do të ndihesh më i qetë brenda vetes.

Pra, le ta lëmë karmën e të tjerëve dhe të përqendrohemi te e jona. Sepse ajo që na pret nuk do të jetë e lehtë. Do të duhen shumë forcë dhe ekuilibër mendor. Më mirë ta përqendrojmë vëmendjen tonë aty ku kemi kontroll: te zgjedhjet që bëjmë çdo ditë. Sepse, në fund të fundit, karma nuk është hakmarrja që po presim. Është paqja që mund të krijojmë vetë.

Burime: Psychology Today

Artikuj të sugjeruar: