Nëse nuk keni jetuar nën ndonjë shkëmb kohët e fundit, me siguri e keni parë memen e famshme të “Chill Guy” në rrjetet sociale. Bëhet fjalë për një qen të animuar me ngjyrë kafe, i veshur me një triko gri, xhinse të mbështjella dhe atlete të kuqe, i cili ka marrë dhenë me qetësinë dhe stilin e tij.

Por jo vetëm interneti është mbërthyer nga “Chill Guy”; ky fenomen ka depërtuar edhe në botën e kriptomonedhave. Për më tepër, artisti që qëndron pas krijimit, Philip Banks, është gati të ndërmarrë masa ligjore për të mbrojtur të drejtën e autorit të ilustruar.

“Nuk do të jap kurrë leje që vepra ime të përdoret për diçka që lidhet me kripto,” – ka deklaruar Banks. Ai gjithashtu paralajmëroi në rrjetin X (ish-Twitter) se do të padisë dhe do të kërkojë heqjen e fotove të “Chill Guy” të përdorura për përfitime financiare. “Vetëm po e them këtu: ‘Chill Guy’ është e mbrojtur me të drejtë autori. Ligjërisht. Do të nis heqjen e përdorimeve për qëllime fitimi ditët e ardhshme.”

Kush është “Chill Guy”?

Ky është një ilustrim i një qeni të animuar me një pamje super të qetë, me duart (apo më saktë, putrat) të futura në xhepa dhe një buzëqeshje të lehtë në fytyrë. Tiparet e tij kanë bërë që interneti të dashurohet me këtë karakter.

Pse është bërë viral?

E thjeshtë: “Chill Guy” është mishërimi i qetësisë absolute.

Një video në TikTok me këtë karakter përshkruan situatën: “Kur ajo të bërtet sepse ke harruar çfarë të tha më herët gjatë ditës, por ti je thjesht një djalë i qetë që po shijon ditën e tij.”

Në thelb, “Chill Guy” përfaqëson atë që të gjithë duam të jemi: të qetë, të përmbajtur dhe të paprekur nga drama e përditshme. Ai përballon situatat stresuese me lehtësi, ofron këshilla të arsyeshme dhe pozitive, duke bërë që të gjithë përreth tij të ndihen më mirë. Jeton momentin dhe nuk shqetësohet për gjëra të tepërta.

Thjesht, bëhuni si “Chill Guy” – apo të paktën, përpiquni.