SHBA/ Trump i rikthehet fushatës
Donald Trump i është rikthyer fushatës elektorale për presidencën e SHBA, pasi i shpëtoi atentatit të dytë. Trump tha se “vetëm presidentëve të rëndësishëm u bëhet atentat”. Më tej, falenderoi kandidaten demokrate, Kamala Harris, për shqetësimin e treguar karshi tij dhe interesimin për gjendjen e ish-presidentit amerikan.
Ish-presidentit iu rrezikua jeta teksa ishte duke luajtur në fushën e tij të golfit. Papritur u dëgjuan të shtëna nga një burrë, i cili qëlloi me një pushkë AK. Menjëherë Shërbimi Sekret e pikasi dhe burri u largua menjëherë, për t’u kapur pas pak minutash. Ky është atentati i dytë që i bëhet Donald Trump. Ai i shpëtoi edhe një tjetër tentative për vrasjeje ndërsa ishte në Pensilvani, duke bërë fushatë. Trump u lëndua në veshin e djathtë.
Japoni/ 25% e të moshuarve vijojnë të punojnë
Japonia po përballet me mungesë të fuqisë punëtore dhe plakjen e popullsisë, e cila ka arritur në nivelin më të lartë të gjitha kohërave. Sipas një raporti të kryer nga ministria e Punëve të Brendshme në Japoni, popullsia e moshuar që punon në vend ka arritur shifrën e 36.25 milionë njerëz, pra 25.2% e popullsisë.
Kjo është vënë re në provinca të ndryshme të vendit, duke theksuar kështu problemet me të cilat Japonia po përballet në mënyrë të vazhdueshme: Rënien e numrit të lindjeve dhe popullsinë që është gjithnjë e duke u plakur.
Gjeorgji/ Miratohet ligji që kufizon të drejtat e LGBT
Qeveria gjeorgjiane ka miratur ligjin për “vlerat e familjes dhe mbrojtjen e të miturve”, që sjell edhe kufizime për të drejtat e komunitetit LGBT. Projektligji në fjalë do të sigurojë një bazë ligjore për të gjitha autoritetet që të shpallin të jashtligjshme eventet “Pride” dhe shfaqjet publike të flamurit të LGBT. Gjithashtu, do të detyrojë edhe censurën e filmave dhe librave.
Kjo, sipas partisë në pushtet, Ëndrra Gjeorgjiane, është e nevojshme që të mbrohen standaret morale e tradicionale të vendit. Ligji është përballur me kritika të shumta. Aktivistët shprehen se kjo masë ka si qëllim rritjen e mbështetjes nga konservatorët për qeverinë, përpara zgjedhjeve të 26 tetorit.
Poloni/ Vendi përballet me përmbytje masive
Polonia ka shpallur gjendjen e fatkeqësisë natyrore si pasojë e përmbytjeve masive me të cilat është përballur vendi. Deri më tani, përmbytjet kanë shkaktuar 5 viktima dhe banorët janë detyruar të lënë banesat dhe të evakuuohen. Kryeministri Donald Tusk u shpreh se është përgatitur një plan për mbështetje financiare nga qeveria.
“E kam thirrur këtë seancë të qeverisë për të miratuar sa më shpejt vendimin për vendosjen e gjendjes së fatkeqësisë natyrore. Unë i jam drejtuar ministrit të financave dhe për momentin kemi siguruar rezerva financiare për nevojat e vendeve dhe njerëzve të prekur nga përmbytjet”, u shpreh Tusk.
Polonia nuk është i vetmi vend që është cenuar nga përmbytjet. Edhe Çekia, Austria e Rumania janë përballur nga reshjet e shumta të shiut dhe autoritetet kanë evakuuar banorët.
