“Arcane”, seriali i animuar në Netflix, i bazuar në lojën “League of Legends”, është seriali më i shtrenjtë i animuar i krijuar ndonjëherë, sipas një raporti të ri nga Variety. 18 episodet e serialit thuhet se kanë kushtuar gjithsej 250 milionë dollarë për t’u prodhuar dhe promovuar. “Riot Games”, zhvilluesi i “League of Legends” dhe producent i “Arcane”, refuzoi të konfirmojë këtë shifër, por i tha Variety:
“Jemi mëse të kënaqur me shpenzimin që na u desh për të ofruar një serial që ishte i denjë për kohën e lojtarëve tanë.”
Thuhet se prodhimi i sezonit të parë kushtoi rreth 80 milionë dollarë, ndërsa sezoni i dytë i kushtoi studios pothuajse 100 milionë dollarë. “Riot” gjithashtu thuhet se shpenzoi 60 milionë dollarë nga paratë e saj për promovimin e sezonit të parë, përveç asaj që u shpenzua nga Netflix.
“Bashkëpunimi ynë në industrinë e argëtimit nuk ka ndryshuar,” tha bashkëthemeluesi i “Riot”, Marc Merrill, për Variety. “Asnjëherë nuk kemi synuar të funksionojmë si një studio tradicionale me afate tradicionale. Ajo që ndryshoi ishte pritshmëria ndaj vetes sonë: kuptuam që për ta bërë siç duhet, duhej shumë më tepër kohë nga ç’prisnim, ndaj ne e rregulluam zhvillimin, qëllimet e prodhimit dhe ekipet tona duke e pasur këtë në mendje.”
Seriali ndjek historinë e Jinx (Ella Purnell) dhe Vi (Hailee Steinfeld), dy motrave që gjenden në anët e kundërta të një konflikti të ashpërsuar mes qytetit utopik Piltover dhe Zaun-it, shtresa e tij e shtypur.
“Arcane” është projekti i vetëm televiziv apo kinematografik që ka prodhuar “Riot Games” deri tani, pavarësisht planeve për të zgjeruar aktivitetin në prodhime të skenarizuara që pesë vjet më parë. Sezoni i dytë i “Arcane”, i cili pritet të jetë i fundit, nis më 9 nëntor në Netflix, ndonëse fillimisht ishin planifikuar pesë sezone.
Artikuj të sugjeruar:
