Ekzistojnë shumë pyetje lidhur me vaginën, njësoj edhe përgjigje. Shpesh herë ndrojtja për t’iu drejtuar gjinekologëve na çon drejt kërkimit në Google apo konsultave me mikeshat tona. A duhet të lani vaginën? A mund të humbasë tamponi? A zgjeron seksi apo lindja e një fëmije vaginën?  Ekspertët tregojnë njëherë e mirë faktet dhe mitet mbi këto dilema.

Vagina është e gjithë zona gjenitale

Mit -Fjala "vaginë" i referohet vetëm një pjese të brendshme specifike: tubit muskulor që çon në qafën e mitrës.  
 
“Pjesa e jashtme, duke përfshirë buzët dhe klitorin, quhet vulvë”,  sqaron Zoe Williams, drejtore e përkohshme në Muzeun e Vaginës.

“Nuk ka vërtet një fjalë të saktë për t'i përshkruar të dyja… përveç fjalëve zhargon,” shpejgon Zoe. Nuk është çudi që 45% e grave nuk mund ta emërtonin me saktësi vaginën në një sondazh të YouGov të vitit 2019.

"Rekomandohet që fëmijët të njihet termat e duhura deri në moshën 10 vjeç," thotë Dr Maureen Whelihan, gjinekologe."Por, pavarësisht dëshirës, prindërit mund t'u mësojnë atyre vetëm atë që dinë.", shton ajo.
 
Tamponët mund të humbasin brenda vaginës tuaj
 
Mit - Është thuajse frika më e madhe e çdo vajze apo gruaja që ka dëgjuar mbi këtë mit!

“Është një frikë e zakonshme, por qafa e mitrës është në hyrje të vaginës dhe ka vetëm një hapësirë të vogël, përmes së cilës një tampon nuk mund të kalojë”, thotë Dr Shazia Malik, konsulente obstetër dhe gjinekologe në spitalin “Portland” të Londrës. "Ky mit mund të shkaktojë ankth të panevojshëm dhe t'i pengojë njerëzit të përdorin tamponë, të cilët janë të sigurt dhe efektivë.", shton ajo.

Vaginën duhet ta pastroni me sapun
 
Mit - “Është mirë të lajmë zonën e vulvës me ujë, por nuk kemi nevojë të pastrojmë brenda vaginës”, thotë Clare Bourne, fizioterapiste e shëndetit të legenit. “Vagina është një pjesë unike që vetëpastrohet dhe ruan një ekuilibër të shëndetshëm të pH-së”, thotë Malik. Kjo është midis 3.8 dhe 4.5, e ngjashme në aciditet me një portokall.
 
 “Përdorimi i sapunëve mund të prishë këtë ekuilibër dhe të çojë në vaginozë bakteriale (BV) dhe infeksione.”  
 
Një vaginë e shëndetshme do të ketë një aromë të lehtë dhe natyrale që ndryshon gjatë gjithë ciklit menstrual, gjatë shtatzënisë ose pas seksit.
 
Nëse keni sekrecione vaginale, diçka nuk është në rregull
 
Mit - “Shumica e sekrecioneve janë një shenjë se vagina po kryen funksionin e saj: parandalon dhe lufton infeksionet”, thotë Ashfaq Khan, një mjek obstetër dhe gjinekolog konsulent në “Harley Street Gynecology”.

"Nëse është një rrjedhje e qartë mukoze ose e bardhë në mes të ciklit menstrual, është normale," thotë ai. “Shumë nga pacientet e mia nuk e pranojnë këtë. Ato mendojnë që nuk duhet të ketë fare sekrecione.”, shton ai.

Por një ndryshim në ngjyrë, erë ose teksturë, mund të sinjalizojë një infeksion. “Nëse vëreni se sekrecionet kanë një ngjyrë shumë të bardhë ose gri dhe ka një erë të rëndë mund të bëhet fjalë për një infeksion bakterial.
 
Sekrecionet në ngjyrë të gjelbër ose të verdhë, ka mundësi që të sinjalizojnë një infeksion seksualisht të transmetueshëm (IST) si trikomoniaza ose gonorrea. Dhe nëse ka gjurmë gjaku të përziera me të tjera sekrecione, duhet me patjetër një takim me gjinekologun për të përcaktuar shkakun,” thotë Khan.
 
Një vulvë normale është ajo më “formë të rregullt”
 
Mit -  “Kam 27 vjet që i shikoj dhe vulvat e rregullta janë të më pak të zakonshmet”, thotë Whelihan, e cila kujdeset për rreth 5.000 vulva çdo vit. “Shumëllojshmëria është normë, jo përjashtim. Vulva është po aq unike sa fytyra e dikujt.”, shton Whelihan.

Dr Shirin Lakhani, një ish-mjeke e përgjithshme e kthyer në mjeke estetike, u tregon pacientëve "murin e saj të vulvës" për të shuar dilemat e pacientëve të saj:

"Disa buzë të brendshme mund të shtrihen përtej buzëve të jashtme, ndërsa të tjerat jo. Të dyja janë krejtësisht normale dhe kryesisht të përcaktuara nga gjenetika dhe fiziologjia individuale.”

Të bësh seks e zgjeron vaginën
 
Mit - “Vagina është një organ elastik i aftë për t'u zgjeruar në madhësinë e kokës së një foshnje, kështu që përmasat e penisit nuk mund ta zgjerojnë atë”, shpjegon Williams.

“Seksi nuk shkakton ndryshime të përhershme në vaginë apo labia. Ata kthehen në formën e tyre të zakonshme më pas dhe pamja e buzëve nuk përcaktohet nga aktiviteti seksual.”

Dr Sarah Jenkins, një ish-mjeke e përgjithshme e cila tani është e specializuar në kujdesin pas lindjes thotë: "Nxehtësia dhe fërkimi nga seksi në fakt ruan lëkurën tonë dhe parandalon atrofinë [gjendja ku lëkura hollohet dhe kanali vaginal bëhet më i shkurtër dhe më i thatë]."

Depilimi i qimeve pubike përcakton higjienën e vaginës

Mit - “Heqja e qimeve pubike është një preferencë personale dhe jo një domosdoshmëri mjekësore,” siguron Sachchidananda Maiti, gjinekologe në “Pall Mall Medical” dhe pedagoge në shkollën mjekësore të universitetit të Manchester.

“Ky mit besohet gjerësisht, veçanërisht në kulturat perëndimore ku mungesa e qimeve publike shpesh lidhet me pastërtinë dhe atraktivitetin,” shton ajo.

Një studim i vitit 2024 zbuloi se rreth 80% e grave depilojnë qimet e tyre pubike. Por qimet publike kanë një punë shumë të rëndësishme: të bllokojnë djersën, bakteret dhe papastërtitë. “Përveç rastit kur qimet janë të infektuara me parazitë ose elementë të tjerë të dëmshëm, heqja e tyre në fakt mund të çojë në acarim dhe në një rrezik më të lartë infeksioni, veçanërisht nëse bëhet me brisqe të papastra”, shton Maiti.
 
Nëse jeni të eksituar, vagina juaj do të laget (gjithmonë)
 
Mit - Ashtu si pjesa e brendshme e gojës, indi vaginal është një membranë mukoze, që do të thotë se është disi e lagësht gjatë gjithë kohës. “Ne kemi gjëndra Bartholin në hapjen vaginale që aktivizohen nga eksitimi dhe na japin lubrifikim shtesë. Por ka shumë gjëra që mund të ndërhyjnë në lubrifikimin natyral edhe nëse jeni të eksituar”, thotë Whelihan. Mosha, menopauza dhe humbja e estrogjenit, infeksionet vaginale dhe medikamente të tilla si antihistaminet mund të thajnë vaginën.

“Është më mirë të mos përdorni lagështinë e vaginës si një barometër”, thotë Silva Neves, psikoterapiste marrëdhëniesh. Është e rëndësishme të mos përqendrohemi te lagështia si e vetmja dëshmi për e aktit seksual sepse edhe pjesët e tjera të trupit mund të reagojnë ndaj eksitimit.”

Ka diçka që nuk shkon me vaginën tuaj nëse nuk arrini kurrë orgazëm përmes penetrimit
 
Mit - “Shumica e grave raportojnë se kanë nevojë për stimulim të klitorit për të arritur kulmin”, thotë Nicole Prause, një psikofiziologe seksuale dhe themeluese e kompanisë së bioteknologjisë seksuale “Liberos”.
 
"Dhe shumica dërrmuese nuk mund të përjetojnë orgazmën vetëm përmes penetrimit vaginal.", shton ajo.
 
Vetëm 18% e grave e arrijnë këtë, sipas një studimi. "Epo kjo ka kuptim," thotë Whelihan, duke shtuar: “Penetrimi është një stimul që jep kënaqësi, por klitori është në murin e jashtëm duke u injoruar! Një studim thotë se nëse distanca midis klitorit dhe hapjes vaginale është më pak se 2 cm, ekziston mundësia për të pasur orgazma vaginale. Nëse është më shumë se 2 cm, mund të mos keni kurrë një të tillë.”
 
Lindja vaginale e zgjeron vaginën me efekt të përjetshëm
 
Mit - “Zakonisht pas një lindjes së një foshnje me madhësi normale, gjithçka kthehet në normalitet”, thotë Whelihan.

“Pas dy, tre dhe katër foshnjeve, muskujt mund të humbasin pak ‘kujtesën’. Nëse bebi është 9 kge, ky është një zgjerim i madh, por indi vaginal mund ta përballojë,” shton Whelihan, megjithëse muskujt mund të kenë nevojë për pak ritrajnim.

Një studim i vitit 2023 zbuloi se ndryshimet e vulvës pas lindjes nuk ndikon në shijimin e seksit.
 
Kosi shëron mykun
 
Mit - “Kosi nuk duhet të përdoret për të trajtuar mykun vaginal, sepse provat mbi këtë janë shumë të pakta ,” thotë Khan. Myku shkaktohet nga kërpudhat candida dhe mund të gjejë terren nëse ekuilibri i baktereve vaginale ndryshon. Mendohet se kosi e zgjidh këtë, por shpesh çekuilibri nuk është shkaku.

“Funksionon vetëm në një grup shumë të vogël njerëzish, kryesisht sepse kosi nuk e trajton problemin. Nuk e zhduk mykun, thjesht e bën mjedisin më të vështirë për rritjen e tij”, shpjegon Khan.

Ndërsa Khan nuk do të përshkruante kosin si një ilaç për të kuruar mykun, ai thotë se nuk e ka problem që pacientët ta përdorin atë për të trajtuar simptoma të lehta ose për të ndihmuar në parandalimin e një infeksioni të përsëritur, por vetëm pasi të kenë marrë trajtimin e duhur.
 
"Shumica e grave e përdorin atë çdo natë, por disa mund të zgjedhin ta aplikojnë atë disa herë në javë, veçanërisht gjatë periudhave të simptomave të përsëritura ose pas përdorimit të antibiotikëve”, shprehet ai.
 
Ushtrimet e legenit ju ndalojnë të urinoni
 
E vërtetë -  Lajm i shkëlqyer! Ushtrimet e legenit [ose Kegels] trajtojnë inkontinencën dhe rekomandohen nga Instituti Kombëtar për Përsosmërinë e Shëndetit dhe Kujdesit (Nice) si një trajtim mjaft efikas.

“Ushtrimet janë një pjesë e mrekullueshme e rimëkëmbjes për njerëzit me inkontinencë”, thotë Bourne. Ushtrimet, tkurrja dhe lirimi i muskujve që përdorni kur urinoni, mund të bëhen 10 herë në ditë. Por ato duhet të bëhen në mënyrë korrekte, paralajmëron Bourne:

“Pas çdo zgjerimi ose tkurrjeje të legenit, është thelbësore që muskujt të relaksohen plotësisht. Nëse fokusohemi shumë tek elementi tkurrës dhe jo në relaksimin e tij, mund të përkeqësojmë simptomat.”
 
Klitori është i vogël
 
Mit - Ajo që shihni nuk është ajo që ekziston vërtetë!

"Shumica e klitorit është e padukshme", thotë Prause. "Pjesa tjetër është brenda trupit dhe madje edhe pjesa e jashtme zakonisht mbulohet nga një “kapuç” klitoral. Për 29% të femrave që nuk e dinë se çfarë apo ku është klitori: është ‘gjilpëra’ e vogël në majë të vulvës, por gjithashtu shtrihet në një strukturë të brendshme të ngjashme me kërpudhat që mund të variojë nga 8 cm deri në 10 cm gjatësi".

Klitori është një mini -penis
 
E vërtetë - Këtu ekspertët nuk pajtohen disi.

“Në javën e nëntë, foshnjat duken saktësisht të njëjta në aspektin gjenital. Nën ndikimin e testosteronit rritet dhe zhvillohet penisi; në mungesë të testosteronit zhvillohet klitori”, thotë Whelihan.

Janë saktësisht në të njëjtin vend dhe kanë të njëjtën strukturë, përveç se në penis boshti ngjitet në majën e gjatë, ndërsa në një vulvë “crura” gjendet pas buzëve të jashtme.”
 
Dr Christine Ekechi, specialiste e shtatzënisë së hershme dhe mjeke obstetër, shprehet ndryshe. "Funksioni ndryshon pasi nuk përmban uretrën dhe nuk është për penetrim," thotë ajo.
 
Një tjetër gjinekolog shprehet: “Ka një të vërtetë për këtë. Klitori ka shumë karakteristika të penisit, duke përfshirë një lloj lafshe dhe një bosht që i përgjigjet goditjeve të gjata. Por nuk mund të ketë ngurtësinë e penisit pasi nuk e ndalon rrjedhjen e gjakut.”
 
Klitori ka më shumë mbaresa nervore sesa penisi
 
Ende nuk është e qartë - Klitorii besohej prej kohësh se kishte 8.000 mbaresa nervore, dyfishi i penisit. Këto nerva kanë rol kyç për seks të mirë pasi ato mund të shkaktojnë një mori ndjesish ekzaltuese (në varësi të mënyrës se si preket dhe sa i eksituar është dikush). Por, u bë e ditur se kjo statistikë erdhi nga një studim i lopëve i botuar në 1976 . Hulumtimet më të reja (ende të pabotuara) sugjerojnë se mund të jetë rreth 10.000.
 
Sipas ekspertëve, është ende e paqartë nëse kush e fiton këtë konkurs unik, klitori apo penisi. " Densiteti i nervave në klitor dhe penis nuk është i njëtrajtshëm në asnjë nga organet," thotë Prause. Për të mos përmendur se zona e densitetit nervor mund të ndryshojë nga individi në individ".
 
Megjithatë, Whelihan mendon se gara përfundon në barazim. "Numri i mbaresave nervore është i njëjtë në të dyja organet gjenitale, por ndjeshmëria ndryshon në varësi të faktit nëse penisi është i bërë synet apo jo."
 
Ndoshta Ekechi e përmbledh më së miri këtë çështje: “Besohet se klitori përmban më shumë, por është jashtëzakonisht pak i studiuar dhe hulumtuar në krahasim me penisin.”

Artikuj të sugjeruar: