Spanja po kalon përmbytjet më të rënda të dekadave të fundit, pasi një sasi shiu e barabartë me atë të një viti të tërë ra brenda pak orësh në rajonet jugore dhe lindore të vendit këtë javë. Stuhia filloi të martën dhe deri tani ka shkaktuar të paktën 155 viktima, sipas autoriteteve në rajonin më të goditur, Valencia, ndërkohë që dhjetëra të tjerë raportohen të zhdukur. Përmbytjet kanë përfshirë qytete dhe rrugë, kanë shkaktuar daljen e lumenjve nga shtrati dhe kanë lënë mijëra banorë pa energji elektrike dhe pa ujë të pijshëm.

Ku ndodhi dëmi më i madh?

Rajonet lindore dhe jugore të Spanjës përballen shpesh me shi gjatë vjeshtës, por reshjet e këtij viti dolën jashtë parashikimeve. Shumica e viktimave ndodhen në Valencia, një rajon bregdetar në Mesdhe dhe një zonë turistike gjatë verës. Përmbytjet e papritura përfshinë zona rurale dhe bllokuan autostradat kryesore, ndërsa qyteti i Valencias u detyrua të përdorë ndërtesat publike si morgje të përkohshme për shkak të viktimave.

Në qytetin Paiporta në Valencia, të paktën 40 persona humbën jetën, përfshirë 6 të moshuar. Shërbimet e transportit publik dhe hekurudhat u pezulluan, ndërsa shkollat, muzetë dhe bibliotekat publike mbetën të mbyllura deri të enjten. Përmbytjet janë raportuar edhe në qytetet si Murcia dhe Malaga, ku ranë më shumë se 100 mm shi.

Si ka reaguar qeveria?

Më shumë se 1,000 ushtarë janë mobilizuar për të ndihmuar në operacionet e shpëtimit, sipas ministres së Mbrojtjes së Spanjës, Margarita Robles. Rajoni i Valencias u përball me vështirësi të mëdha, ndërsa disa zona mund të arriheshin vetëm me helikopter. Kreu rajonal i Valencias, Carlos Mazon, raportoi se ekipet e shpëtimit po gjenin trupa pasi arritën në zonat e izoluar nga përmbytjet.

Qeveria spanjolle dërgoi paralajmërime emergjente për banorët, duke i këshilluar të qëndronin në shtëpi ose të kërkonin terrene të larta. Agjencia Shtetërore e Meteorologjisë në Spanjë (AEMET) lëshoi paralajmërime për reshje ekstreme, duke përfshirë parashikimet për 200 mm shi brenda 12 orësh në disa zona. Në disa raste, këto parashikime u tejkaluan brenda kohës së shkurtër.

Kryeministri i Spanjës, Pedro Sanchez, premtoi mbështetje për viktimat dhe shpalli tre ditë zie kombëtare, duke ftuar qytetarët të jenë të kujdesshëm. Ndërkohë, mijëra banorë të periferive të Valencias mbetën pa energji elektrike dhe ujë të pijshëm deri të enjten, ndërsa operacionet e kërkimit dhe pastrimit vazhdonin.

Çfarë shkaktoi përmbytjen?

Sipas meteorologëve spanjollë, përmbytja erdhi nga një fenomen i njohur si “gota fría” ose “pika e ftohtë”, që përfshin një masë ajri të ftohtë të bllokuar në atmosferë. Ky fenomen ndodh më shpesh në vjeshtë dhe shkakton reshje të dendura.

Ndërsa roli i saktë i ndryshimeve klimatike në këtë përmbytje kërkon ende analizë, shkencëtarët paralajmërojnë se ngrohja globale rrit mundësinë e reshjeve ekstreme. Temperaturat më të larta të detit dhe ajri më i ngrohtë mbajnë më shumë lagështi, duke e shndërruar këtë në shi të rrëmbyeshëm.

Si krahasohet me përmbytjet e mëparshme?

Kjo përmbytje është një nga më shkatërrueset që Spanja ka përjetuar prej dekadash. Në vitin 1959, një përmbytje shkaktoi 144 viktima në Ribadelago, por atëherë katastrofa u shkaktua nga shpërthimi i një dige dhe jo nga reshje natyrore. Në vitin 1996, një tjetër përmbytje natyrore vrau 87 persona në afërsi të Biescas në Pirenej. Pavarësisht përmbytjeve të rënda në Spanjë gjatë viteve të fundit, asgjë nuk krahasohet me nivelin e shkatërrimit të kësaj jave.