Erik dhe Lyle Menendez, vëllezërit që u dënuan për vrasjen e prindërve të tyre në vitet ’90, mund të jenë shumë afër lirimit. Sipas burimeve të TMZ, më 11 dhjetor do të mbahet një seancë gjyqësore vendimtare, ku një gjykatës mund të vendosë lirimin e tyre të menjëhershëm, vetëm disa ditë para festave të fundvitit.
Gjyqtari i ri i çështjes, Michael V. Jesic, pritet të shqyrtojë një kërkesë të avokatëve të Erik dhe Lyle për të ndryshuar akuzën nga vrasje në vrasje pa paramendim. Nëse kjo kërkesë pranohet, vëllezërit Menendez do të lirohen menjëherë, pasi tashmë kanë kryer tre herë më shumë sesa dënimi maksimal për një akuzë të tillë.
Rrugët e tjera drejt lirisë për vëllezërit Menendez
Përveç ndryshimit të akuzës, ka edhe dy mënyra të tjera që mund të çojnë në lirimin e tyre. Njëra prej tyre është nisur nga Prokurori i Los Anxhelosit, George Gascón. Ai ka kërkuar që gjykatësi të shfuqizojë dënimin e përjetshëm pa mundësi lirimi me kusht dhe ta zëvendësojë me një dënim prej 50 vitesh deri në jetë, që nënkupton një mundësi të menjëhershme për aplikim për lirim me kusht. Në këtë skenar, liria e vëllezërve do të varej nga vendimi i bordit të kushtëzuar, një proces që mund të zgjasë deri në 6 muaj.
Një opsion i fundit për vëllezërit Menendez është kërkesa për falje nga guvernatori i Kalifornisë, Gavin Newsom. Avokati i tyre, Mark Geragos, është duke përgatitur një peticion për falje, duke kërkuar që Newsom të lehtësojë dënimin e tyre dhe t’i lirojë.
Sipas burimeve të TMZ, ka shumë mundësi që procesi të mbyllet shpejt dhe që vëllezërit të jenë në shtëpi për festat e fundvitit. Megjithatë, ka edhe mundësinë që gjyqtari të marrë kohë për ta shqyrtuar çështjen, duke e shtyrë pak këtë vendim. Deri më tani, përpjekjet për lirinë e tyre kanë marrë një ritëm të shpejtë dhe mbetet për t’u parë nëse ky rast i famshëm do të përfundojë me një kthim në shtëpi për Erik dhe Lyle Menendez, pas më shumë se tri dekadave në burg.
Artikuj të sugjeruar:
