Izraeli kufizon operacionet e OKB-së që shpërndajnë ndihma në Gaza

Ligjvënësit në Izrael miratuan një ligj të ri që kufizon agjencinë e OKB-së për refugjatët palestinezë, UNRWA, duke ndaluar atë të kryejë shërbime dhe aktivitete brenda territorit izraelit. Ligji kërcënon punën e agjencisë në një periudhë kritike, kur shpërndarja e ndihmave në Gaza është bërë më jetike për shkak të krizës humanitare në rritje.

UNRWA e dënoi vendimin me një deklaratë ku theksoi se kjo çështje është një shqetësim global. Ndonëse ligji nuk hyn menjëherë në fuqi, pritet që ai të krijojë pengesa në shpërndarjen e ndihmave për miliona palestinezë në Gaza, të cilët varen nga këto ndihma për mbijetesë për shkak të mungesave të rënda të ushqimit, ujit dhe ilaçeve.

BE dënon sulmin e ushtrisë izraelite ndaj UNIFIL-it në Liban

Në një takim të mbajtur në Barcelonë, përfaqësuesi i lartë për politikën e jashtme të BE-së, Josep Borrell, dënoi sulmin e ushtrisë izraelite ndaj trupave paqeruajtëse të OKB-së, UNIFIL, në Liban. Ai theksoi se është e rëndësishme të përmendet se sulmet vijnë nga ushtria izraelite.

Izraeli ka mbrojtur praninë e tij ushtarake në jug të Libanit dhe sulmet kundër pozicioneve të Hezbollah si të nevojshme për vetëmbrojtje ndaj kërcënimeve nga grupet e mbështetura nga Irani. Borrell gjithashtu kërkoi sanksione për zyrtarët izraelitë dhe disa ministra përgjegjës për veprimet e dhunshme ve në Bregun Perëndimor.

Presidentja e Gjeorgjisë bën thirrje për protesta pas zgjedhjeve të kontestuara

Presidentja e Gjeorgjisë, Salome Zurabišvili, tha se nuk e njeh rezultatin e zgjedhjeve parlamentare, të cilat sipas komisionit zgjedhor u fituan nga partia në pushtet, “Georgian Dream”. Ajo akuzoi Rusinë për manipulim të zgjedhjeve dhe bëri thirrje për protesta në Tbilisi, duke e cilësuar procesin si një “vjedhje të plotë të votës” së qytetarëve.

Ky zhvillim pritet të çojë trazira të tjera politike në Gjeorgji, një vend që aspiron të anëtarësohet në BE, por që përballet me sfida pas miratimit të një ligji që ngjason me ligjet ruse për “influencën e huaj.”

Norvegjia nënshkruan marrëveshje për mbrojtje ajrore me SHBA

Norvegjia njoftoi të hënën se ka nënshkruar një marrëveshje për blerjen e raketave mbrojtëse ajrore AIM-120C-8 nga SHBA, me vlerë mbi 4 miliardë korona norvegjeze. Ministri i Mbrojtjes, Bjorn Arild Gram, theksoi se ky përforcim do të ndihmojë në mbrojtjen e vendit nga sulmet ajrore.

Në kuadër të tensioneve me Rusinë pas sulmit ndaj Ukrainës, Norvegjia dhe vendet nordike po rrisin masat mbrojtëse. Raketat mund të përdoren edhe për avionët F35A, të cilat Norvegjia ka aktivizuar kohët e fundit.