Ilir Meta është arrestuar me urdhër të SPAK, bëjnë me dije mediat dhe burimet pranë “Report TV”. Kreu i Partisë së Lirisë është arrestuar para se të mbante një konferencë për shtyp.
Ende nuk janë bërë me dije se cilat akuza rëndojnë mbi politikanin. Në proces hetimor janë çështjet për skandalin CEZ-DIA, lobimi në SHBA, si dhe hetim pasuror familjar. Sipas gazetares Keti Banushi, Meta është arrestuar në hyrje të Tiranës.
Përditësim: Sipas gazetarit Eni Ferhati, janë caktuar 3 masa sigurie nga Gjykata, të cilat përfshijnë: Arrestim për Ilir Metën; detyrim paraqitjeje për ish-bashkëshorten e tij, Monika Kryemadhi; detyrim paraqitjeje për një tjetër zyrtar të LSI-së, identiteti i së cilit nuk është bërë publik.
Sipas gazetarit, mbi Ilir Metën rëndojnë akuzat e korrupsionit dhe mosdeklarimit të pasurisë.
“Ka masë sigurie edhe për persona të lidhur me Metën. Pritet që të ketë kontrolle banesash. Operacioni nuk cilësohet ende i mbyllur nga agjentët. Janë disa dosje që janë hetuar: CEZ DIA, hetimi pasuror ku është marrë në pyetje edhe ish-bashkëshortja e tij, Monika Kryemadhi dhe nëna e saj. Dhe një çështje që lidhte me LSI ku SPAK ka çelur një hetim të lobimit të kësaj partie ku janë pyetur disa ish-zyrtarë. Nuk dihet nëse këto dosje janë bashkuar në një. Nga informacionet, Meta nuk ka bërë rezistencë", u shpreh Eni Ferhati për Euronews.
Për arrestimin e tij kanë reaguar Sali Berisha dhe Tedi Blushi, sekretari i përgjithshëm i Partisë së Lirisë.
“Çdo gjë ndaj tij është politike. Persekutimi politik i Ilir Metës është politik, politik dhe vetëm politik. Nuk kanë publikuar asnjë fakt, asnjë dokument, por kanë zbatuar urdhrat e Edi Ramës, i cili është përpjekur me të gjitha mënyrat për eliminimin politik e ndoshta edhe fizik të Ilir Metës", tha ndër të tjera Sali Berisha.
Blushi, nga ana tjetër, e quajti "skandaloz" vendimin për arrestimin e ish-presidentit Meta.
“Arrestojnë në mes të ditës ish-presidentin e republikës, ish-kryeministrin dhe ish-kryetarin e parlamentit. Nuk e di ku ndodhet dhe kjo është fatkeqësi, kjo tregon një gjendje skandaloze”, tha ai.
