Presidenti Zelensky thotë se "nuk presin shumë" nga bisedimet me Rusinë

Ndërkohë që situata vijon të jetë kaotike, të gjithë i kanë sytë nga takimi që do të zhvillohet sot (e hënë 28 shkurt). 

Delegacioni ukrainas dhe Rusia do të takohen në kufirin Ukrainë-Bjellorusi në një vend të paidentifikuar. Presidenti ukrainas tha se nuk pret shumë nga ky takim, por do ta provojë në mënyrë që qytetarët të mos kenë dyshime tek ai si president.

Ai theksoi se së bashku me kabinetin e tij, ndodhet në Ukrainë dhe të gjithë do të mbrojnë deri në fund Ukrainën dhe kufijtë e saj.

Pas sanksioneve të vendosura, rubla ruse bie ndjeshëm

Vlera e rublës ruse ka rënë me 30% kundrejt dollarit amerikan, pasi vendet perëndimore njoftuan për sanksionet e rënda ndaj Rusisë. Rekordi i ri më i ulët i monedhës ruse vjen pasi disa nga bankat kryesore të vendit janë bllokuar nga sistemi ndërkombëtari i pagesave Swift.

Dje, banka qëndrore ruse bëri apel për qetësi dhe paqe, e frikësuar se kjo gjendje mund t'i japë bankave të vendit goditje fatale.

Lëvizja e BE-së, SHBA dhe vendeve të tjera për të ndërprerë marrëdhënien e bankave ruse me Swift është sanksioni më i rëndë i marrë si dënim për sulmin ndaj Ukrainës. Asetet e bankës qëndrore ruse do të qëndrojnë të ngrira, duke limituar kështu aftësinë e vendit për të aksesuar rezervat e tij jashtë vendit.

Sipas Zelensky-it, Ukrainën e presin 24 orë vendimtare

Kreu i Ukrainës tha se 24 orët e ardhshme janë kritike dhe vendimtare për vendin, pasi sulmi rus po shtrihet në të gjithë territorin. 

Komente të tilla, presidenti i bëri gjatë një bisede telefonike me kryeministrin britanik, Boris Johnson, ndërsa ky i fundit lavdëroi udhëheqjen e Zelenskyt gjatë kësaj periudhe.

Nga biseda, kryeministri britanik tha se do të bënte gjithçka për të siguruar ndihmën e nevojshme që i duhet Ukrainës nga Britania e Madhe.

Ursula von der Leyen: 'Ukraina është një prej nesh dhe ne i duam."

Presidentja e Komisionit Europian, Ursula von der Leyen tha se Ukraina i përket BE-së dhe blloku e sheh si pjesë të saj. Kjo deklaratë vjen në një moment kur tensionet janë të larta dhe Rusia pretendon të kundërtën dhe është e bindur për t'i shkuar gjer në fund. 

“Në të vërtetë, me kalimin e kohës, ata na përkasin neve. Ata janë një prej nesh dhe ne i duam ata”, tha von der Leyen.

Pavarësisht kësaj, Rusia kundërshton integrimin e saj në Bashkimin Evropian dhe në NATO.

Burimi: BBC, CNN