Kemi një sugjerim për ty që do të shohësh diçka ndryshe: “Strange Darling”. Një film makabër, i cili sfidon edhe konceptet e horrorit, na bëri goxha përshtypje, sidomos për faktin se nuk është aspak klishé, por një film tejet i veçantë.
Një vrasëse seriale, e cila është po aq drithëruese sa krimet që kryen, sjell frikë dhe terror në një film me 6 kapituj që nuk kanë shumë lidhje me njëri-tjetrin.
Që të jemi të sinqertë, ky film nuk është për të gjithë dhe jo, nuk do të të lërë një shije të mirë, përkundrazi, do të të trondisë.
Në çdo kapitull, shikuesi përballet me provokim, me probleme që lidhen me politikën, seksin, si dhe debatet e shumta mes grave dhe burrave. Për mendimin tonë, ky është një homazh shumë i bukur i filmave të para 50 vitesh, ku horrori dhe mizogjinia janë tema prezente.
Filmi nis me historinë e një dysheje të luajtur nga Kyle Gallner ("The Demon") dhe Willa Fitzgerald ("The (Electric) Lady"), e cila bën një performancë fantastike. Në film përfshihen edhe dy hippies, Frederick (Ed Begley Jr) dhe Genevieve (Barbara Hershey), si dhe dy oficerë policie, Pete (Steven Michael Quezada) dhe Gale (Madisen Beaty), të cilët kanë një rëndësi të madhe në këtë narrativë.
Ngjarjet zhvillohen në një zonë rurale në Oregon, ku gruaja (“The Lady”) dhe burri (“The Demon”) përfshihen në një one-night stand dhe më pas, në një përndjekje dhe lojë psikologjike, e cila ndonëse nuk ka një vijë kronologjike, sërish arrin të përcjellë të gjithë emocionet dhe terrorin. Ajo vret sepse nuk sheh njerëz, thjesht demonë dhe burri në motel është një demon.
“Gjahtari/ja” dhe “viktima” luajnë me role në one-night stand dhe ai pretendon se është një vrasës serial, ndërsa ajo viktima. Të dy, si "Lady", ashtu dhe "Demon" përdorin substanca narkotike. Rolet sadomazokiste shumë shpejt kthehen në realitet dhe më pas, filmi bëhet një kryevepër horrori e kohëve moderne.
Artikuj të sugjeruar:
