Edlira Çepani, përmes një postimi në rrjetet sociale, ka shprehur mbështetjen dhe falënderimet e rastit për të gjithë njerëzit që i kanë qëndruar pranë në këtë periudhë të vështirë, pas ndarjes nga jeta të të shoqit, Gert Bogdani.

Edlira e nis me një falënderim postimin e saj, për të gjithë familjarët, miqtë dhe të kolegët që ishin të pranishëm gjatë atyre ditëve.

“Kam nisur qindra herë të shkruaj dy fjalë, por s’kam pasur forcë, as në duar e as në zemër. Prej kaq shumë ditësh, kam në zemër një fjalë që dua t’ua them të gjithëve: Faleminderit për mbështetjen e pakufishme në këto kohë të vështira për familjen tonë!", u shpreh ajo.

"Faleminderit për mijëra përqafimet me të cilat shprehët mbështetje dhe respekt për Gertin, gjatë homazheve të pafundme në Parlament. Faleminderit të gjithë miqve, kolegëve, qytetarëve e mbështetësve që erdhët në kohë rekord nga e gjithë Shqipëria, Kosova, Mali i Zi, Maqedonia e nga shumë vende të botës, për të na mbështetur në ditën tonë më të vështirë,” shkroi Edlira.  

Bashkëshortja e deputetit të ndjerë, nuk harron që të falënderojë të gjithë njerëzit që arritën të prisnin për të tëra në radhët e gjata të ato ditë të vështira për të, por edhe gjithë familjen.

“Faleminderit që pritet me orë të tëra në radhët e gjata të homazheve për ta respektuar Gertin tonë dhe për t’i dhënë lamtumirën e fundit. Faleminderit nga zemra të gjithë kolegëve nga institucionet në Shqipëri, Kosovë, Belgjikë e Shtetet e Bashkuara të Amerikës për nderimet me një minutë heshtje në mbledhjet e para pas ndarjes nga jeta të Gertit dhe për telegramet zyrtare për nderimin e tij. Faleminderit të gjithë miqve të mediave për emisionet, fjalët dhe transmetimet maratonë,” shton Çepani.

Edlira falenderoi edhe mediat dhe të gjithë njerëzit që kanë qenë pjesë në rrugëtimin e shkurtër të jetës së tij që u ndërpre në mënyrë të beftë në moshën 44-vjeçare.

“Faleminderit të gjithëve për mijëra mesazhet (të cilave premtoj se do u kthej përgjigje të gjithave, pak nga pak) përmes të cilave ndatë pak nga dhimbja jonë dhe na përcollët histori të vogla të jetës së Gertit, ashtu si e kishit njohur. Sa më shumë njerëz takojmë këto ditë, aq më shumë kuptojmë se sa shumë njerëz ka pasur ndikim në jetën e tij tejet të shkurtër, por të mbushur me dashuri për njerëzit dhe me modestinë për gjithçka bënte (dhe s’e promovonte kurrë mjaftueshëm).

Jo vetëm për të si bashkëshorte, por edhe për fëmijët dhe të bashkëpunëtorët e tij, Gert Bogdani, sipas Edlirës mbetet një model i rrallë që do u mungojë të gjithëve.

“Sa më shumë kalojnë ditët nga ikja jote, Gert, dhimbja duket se rritet në këtë realitet të ri, pa ty fizikisht mes nesh. Por, dashuria dhe mbështetja e pafund e njerëzve që të kanë dashur ty, është një mbështetje e madhe për ne! Ti e jetove jetën me fuqinë e vlerave. Luftove gjatë gjithë jetës për të dhënë një model ndryshe, mes miqve, në familje, kudo. Ti luftove me një këmbëngulje të rrallë për ta bërë punën tënde, në shërbim të njerëzve. Luftove për të treguar se vlerat duhet të mbizotërojnë, edhe atëherë kur duket e pamundur. Ti e fitove betejën tënde! Mirësia jote dhe vlerat e tua i bashkuan njerëzit!”
Ajo shton se Gerti e fitoi betejën e tij me dinjitet dhe fisnikëri!

“Ti fitove, ashtu siç bëje gjithmonë në jetë, dhe kësaj here na e kujtove të gjithëve se, edhe në këtë botë që po bëhet çdo ditë e më e vështirë, ia vlen të jetosh me vlera, me integritet, me dinjitet, me fisnikëri, me besim, me mirësinë dhe me dashuri për njerëzit! Faleminderit që ishe një dritë në rrugën e kaq shumë njerëzve dhe që do jesh gjithmonë një dritë në rrugën tonë, jeta ime!”

Edlira dhe Gerti ishin prej vitesh të dashuruar dhe martuar dhe prindër të dy fëmijëve.

Artikuj të sugjeruar: