Bota ndoshta nuk është gati, por një ndër kampionët më të mëdhenj të historisë së tenisit, Rafael Nadal, ka njoftuar tërheqjen nga tenisi. Ai bëri me dije se pas ndeshjes së radhës, në nëntor në garën “Davis Cup”, do të tërhiqet përfundimisht nga pasioni dhe sporti ku u bë i njohur ndërkombëtarisht.

Përmes një videoje në rrjetet sociale, Nadal, 38 vjeç, ka vendosur të mbyllë karrierën, për shkak të problemeve fizike me të cilat është përballur gjatë viteve. Ai ka thënë edhe më parë se viti 2024, ndoshta do të ishte viti i fundit në karrierë, por s’kishte bërë një deklaratë zyrtare.

"E vërteta është se kanë qenë disa vite të vështira, veçanërisht këto të fundit," tha Nadal në video. "Nuk mendoj se kam qenë në gjendje të luaj pa kufizime. Është padyshim një vendim i vështirë, një vendim që më ka marrë kohë për ta vendosur. Por në këtë jetë, gjithçka ka një fillim dhe një fund dhe mendoj se është koha e duhur për t'i dhënë fund një karriere që ka qenë e gjatë dhe shumë më e suksesshme sesa e kam imagjinuar."

Më tej, shtoi:

"Ndihem jashtëzakonisht me fat për të gjitha gjërat që kam mundur të përjetoj. Dua të falënderoj gjithë industrinë e tenisit; të gjithë njerëzit e përfshirë në këtë sport; kolegët e mi e veçanërisht, rivalët e mi të mëdhenj. Kam kaluar shumë, shumë orë me ta dhe kam përjetuar shumë momente që do t’i kujtoj për pjesën tjetër të jetës sime," vazhdoi ai.

Nadal ka qenë 14 herë fitues i “French Open” dhe është pjesë e “The Big 3”, e përbërë nga Novak Djokovic, Roger Federer dhe Rafael Nadal. Sportisti i famshëm e mbyll karrierën e tij me 22 Grand Slame, 14 tituj “Roland Garros”, 4 “US Open”, si dhe 5 edicione “Davis Cup”.