Siç mund ta dini, Lindja e Mesme po përjeton një krizë të thellë dhe është në prag të një lufte rajonale, e cila përfshin deri më tani Gazën, Izraelin, Libanin, Iranin dhe Jemenin. Izraeli është duke sulmuar në të gjitha frontet, pra, Hamasin në Gaza, Hezbollahun në Liban dhe Houthët në Jemen. Të gjitha këto njësi terroriste janë të mbështetura nga Irani, ushtarakisht dhe financiarisht.
Më tej, do të gjesh zhvillimet e reja që kanë ndodhur deri më tani në situatën kaotike në Lindjen e Mesme.
- Izraeli ka lajmëruar se trupat të tjerë të ushtrisë izraelite do t’i bashkohen misionit që po ndodh në jug të Libanit. Forcat Mbrojtëse Izraelite në një postim në X u shprehën: “Divizioni i 36-të, duke përfshirë ushtarë të brigadës Golan, brigadës 188 të Blinduar, brigadës së 6-të të Këmbësorisë dhe forca shtesë, po u bashkohen sulmeve të kufizuara, të lokalizuara, që synojnë objektivat terroriste të Hezbollahut dhe infrastrukturës terroriste në Libanin jugor. Operacioni nisi të hënën”.
- Hezbollah shprehet se ka kryer disa sulme kundrejt forcave izraelite, të përfshira në operacionin në veri të Izraelit. Pretendimet ende nuk janë konfirmuar nga burime të pavarura. Lajmi është bërë i ditur nga Al Jazeera, zyrat e së cilës janë ndaluar të operojnë brenda Izraelit, sipas urdhrit të Benjamin Netanyahu-t, kryeministrit izraelit.
- Autoritetet kineze kanë bërë me dije se 200 shtetas kinezë janë larguar nga Libani. Qeveria libaneze po bashkëpunon me qeveritë e vendeve të ndryshme, me qëllim që të evakuuojë në mënyrë të sigurt njerëzit, pas sulmeve të shumta që Izraeli po kryen në vend.
- Reuters raportoi se Hezbollah pretendon se ka shënjestruar zona të reja në veri të Haifa, në Izrael. Thuhet se sirenat e alarmit janë dëgjuar në këtë zonë.
- Mediat izraelite raportojnë se 10 shtëpi janë dëmtuar nga raketat dhe zjarri në Metula, një komunitet izraelit, në kufi mes Izraelit dhe Libanit.
- Të paktën 60 njerëz janë vrarë në Gaza si pasojë e sulmeve izraelite brenda natës. Ushtria izraelite ka hedhur raketa të shumta në Rripin e Gazës, duke përfshirë edhe zona ku strehoheshin familjet, si dhe godina mjekësore.
- Reuters dhe mediat lokale thanë se tanket izraelite mësynë në qendër të Khan Younis dhe në jug të Rripit të Gazës dhe shkaktuan 40 të vdekur dhe dhjetëra të plagosur. Të paktën 22 palestinezë u vranë në Gaza, pasi forcat izraelite qëlluan mbi një shkollë që shërbente si strehë.
- Izraeli raportoi se rreth 100 raketa u qëlluan gjatë ditës së sotme nga ana e Libanit.
Artikuj të sugjeruar:
