Boris Johnson, ish-kryeministri i Mbretërisë së Bashkuar, është shprehur se mbretëresha Elizabeth II ishte diagnostikuar me kancer në kocka gjatë viteve të saj të fundit. Johnson, 60 vjeç, ka përshkruar marrëdhënien e tij me mbretëreshën e ndjerë në librin e tij me kujtime, “Unleashed”, duke detajuar edhe takimin e tij me mbretëreshën në kështjellën Balmoral në shtator të vitit 2022, disa ditë para se ajo të ndërronte jetë.

“E dija prej një viti ose më shumë kohë se ajo vuante nga një lloj kanceri në kocka dhe mjekët e saj ishin të shqetësuar për shëndetin e mbretëreshës”, shkruan Johnson në librin ende të papublikuar. Materiali në fjalë është marrë nga “Daily Mail”.

Para takimit, Johnson thotë se sekretari privat i mbretëreshës, Edward Young, e paralajmëruar se “shëndeti i saj ishte përkeqësuar pak përgjatë verës”. Më tej, Johnson thotë se mbretëresha dukej e zbehtë dhe kishte të nxira në duar dhe kyçe, ndoshta prej injeksioneve dhe kurimeve që bënte.

“Por mendja e saj, ashtu siç thoshte edhe Edward, ishte totalisht e paprekur nga sëmundja e saj dhe kohë pas kohe gjatë bisedës sonë, ajo sërish dhuronte një buzëqeshje mahnitëse”, shtoi ish-kryeministri.

Mbretëresha ndërroi jetë 2 ditë pasi takoi ish-kryeministrin, në moshën 96-vjeçare. Sipas Johnson, mbretëresha e dinte gjatë gjithë verës se ç’do të ndodhte, por ishte e përkushtuar që të jetonte dhe të bënte edhe detyrat e saj të fundit.

Boris Johnson, ish-udhëheqësi i Partisë Konservatore, dha dorëheqjen nga pozicioni i tij si kryeministër pikërisht gjatë këtij takimi. Ai ishte kryeministri i 14-të në historinë e udhëheqjes 70-vjeçare të Elizabeth II.

Ai gjithashtu shkroi në libër edhe këshillën që mbretëresha i dha: “Nuk ka vend për hidhërim”, u shpreh mbretëresha e ndjerë. “Amen për këtë fjalë. Nëse kushdo në politikë dhe në jetë mund të shihte aq qartë sa ajo, bota do të ishte një vend shumë më i lumtur”.

Ndonëse diagnoza e mbretëreshës Elizabeth II nuk u bë kurrë publike, Johnson nuk është i pari person që aludon se ajo ishte diagnostikuar me kancer gjatë viteve të fundit të jetës. Edhe autori mbretëror Gyles Brandreth shkroi në librin “Elizabeth: An Intimate Portrait” në vitin 2022 se ajo vuante nga një lloj i rrallë i kancerit në kocka, duke argumentuar se ky ishte shkaku për problemet e saj shëndetësore, lodhjen dhe humbjen e peshës.

Shkaku i vdekjes së mbretëreshës u caktua si “nga mosha” dhe pallati nuk ka dhënë kurrë detaje mbi të.