Seriali më i komentuar i momentit në platformën Netflix është padyshim “The Lyle and Erik Menendez Story”, një histori gati e pabesueshme, plot rrëfime dhe ngjarje të tmerrshme. Në një nga rolet kryesore është edhe aktori Javier Bardem, që interpreton Jose Menendez, babanë e dy vëllezërve.
Javier në një intervistë për “Variety”, thotë se e kupton zhgënjimin e Erik Menendez, një prej vëllezërve që aktualisht vuan dënimin me burgim të përjetshëm për vrasjen e prindërve të tij në një prej burgjeve në San Diego.
“E di që ai ka reaguar, por nuk e kam lexuar saktësisht se çfarë ka thënë. Sigurisht që është normale dhe logjike që të thuash çfarë mendon për jetën tënde duke qenë pjesë e këtij seriali. Unë e mbështes kritikën e tij, por Ryan Murphy dhe Ian Brennan, dy regjisorët kishin pikëpamjet e tyre në mënyrën e materializimit të kësaj historie kaq të pabesueshme,” thotë ai.
Cooper Koch, i cili luan në serial rolin e Erik Menéndez, tha se reagimi i njërit prej vëllezërve të famshëm ka ndikuar jo pak në mënyrën e perceptimit të rolit dhe mënyrës si gjithçka përcillet në sytë e publikut.
“E kuptoj se sa i vështirë është fakti që pjesa më e keqe e jetës tënde transmetohet në televizion për miliona njerëz. Është kaq ekspozuese. Unë e kuptoj se si ai ndihet dhe jam pranë tij për sa i përket qasjes ndaj gjithë kësaj historie. Thjesht më duhej të bëja më shumë kërkime dhe të gërmoja shumë thellë në veten time për ta portretizuar atë me integritet dhe sa më autentik,” u shpreh aktori.
Nga ana tjetër, edhe një nga regjisorët, Ryan Murphy, u është përgjigjur kritikave të Erik Menendez duke theksuar faktin se nëse ai do e shihte me vëmendje gjithë realizimin, pjesa më e madhe e tij lidhet me abuzimin e tmerrshëm që vëllezërit pretendojnë se është bërë ndaj tyre.
Seriali “The Lyle and Erik Menendez Story” tregon historinë e vrasjeve dhe gjyqit, në të cilin vëllezërit Menendez pretendojnë se janë abuzuar seksualisht nga babai i tyre (prokuroria e quajti këtë një gënjeshtër dhe tha se motivi i tyre ishte lakmia). Megjithatë, ky produksion është vënë nën kritika, sepse në dukje nënkuptohet se vëllezërit kishin gjithashtu një marrëdhënie seksuale me njëri-tjetrin.
Artikuj të sugjeruar:
Burimi: Enterteiment
