Avioni rus godet aksidentalisht qytetin rus pranë kufirit me Ukrainën
Një aeroplan luftarak rus ka qëlluar aksidentalisht qytetin e Belgorodit afër Ukrainës, duke shkaktuar një shpërthim dhe duke dëmtuar ndërtesat, tha agjencia e lajmeve Tass, duke cituar ministrinë ruse të mbrojtjes.
Të enjten vonë, autoritetet lokale raportuan një shpërthim të madh në qytet, i cili shtrihet përtej kufirit me Ukrainën. Guvernatori i rajonit tha se dy gra u plagosën dhe katër ndërtesa banimi u dëmtuan.
Biden mund të shpallë fushatën presidenciale 2024 javën e ardhshme
Presidenti amerikan Joe Biden dhe ekipi i tij mund të shpallin fushatën e rikandidimit, sipas një burimi të njohur me këtë çështje. Ai ka thënë prej kohësh se synon të kandidojë sërish, por mungesa e një njoftimi zyrtar kishte ngjallur dyshime për mandatin e dytë.
Kolera “ringjallet” në Siri pas tërmeteve
Pas tërmeteve shkatërruese në fillim të shkurtit, që përkeqësuan kushtet e jetesës në Siri dhe shkatërruan infrastrukturën, ishte e pashmangshme rishfaqja e kolerës. Deri në fillim të prillit, më shumë se 13,000 raste dhe të paktën 23 vdekje të konfirmuara u regjistruan në rajon.
Si rezultat i tërmetit, aktivitetet e mbikëqyrjes për kolerën u pezulluan përkohësisht, disa qendra të trajtimit të kolerës u përdorën si qendra për traumat dhe të tjera si strehimore për komunitetet e zhvendosura.
“Më në fund mbaroi”: dy burra lirohen pasi kryen gabimisht 17 vjet burg
Dy burra që bënë gati 17 vjet burg pasi u dënuan gabimisht për tentativë vrasjeje u shpallën të pafajshëm të enjten në Kaliforni. Sipas një ligji të ri, shteti duhet t'u paguajë atyre 140 dollarë për çdo ditë që kanë kaluar pas hekurave, ose rreth 900,000 dollarë.
Dupree Glass dhe Juan Rayford ishin përkatësisht 17 dhe 18 vjeç kur u arrestuan në vitin 2004 gjatë një sherri ku përfshihej një grup adoleshentësh në një shtëpi në Lancaster, në veri të Los Angeles. Dy persona u goditën me armë zjarri, por sipas dosjeve gjyqësore, plagët nuk ishin të rënda. Të dy të pandehurit u dënuan për 11 akuza për tentativë vrasje dhe u dënuan me 11 burgime të njëpasnjëshme të përjetshme.
