Ceremonia e çmimeve Emmy do të zhvillohet më 15 shtator 2024 dhe eventi i këtij viti, le të themi se do të na prezantojë me një garë të fuqishme. Nominimet janë goxha të forta dhe lista kryesohet nga “The Bear”.
Dan Levy do të jetë prezantuesi i ceremonisë, së bashku me të atin, Eugene Levy.
Duke nisur nga rëndësia e çmimeve dhe prurjet interesante të serialeve, Anabel ka bërë një parashikim për fituesit e vitit.
Seriali dramë – “Shogun”
“Shogun” është gjithashtu një serial që nuk duhet ta humbësh! Ai tregon për dinastinë brutale e shekullit të 17-të në Japoninë ku nderi, parimet dhe pushteti ishin elementet kryesore. Një dramë epike dhe shumë e detajuar, sjell padiskutim një ndër prodhimet më të mira të këtij viti në botën e serialeve.
Historia e Lord Yoshii Tornaga (Hiroyuki Sanada) sjell një përzierje mes integritetit dhe mizorisë, si dhe një rrëfim të bukur romantik dhe heroik, i cili gërsheton ndjenjat më sublime me kodin e nderit.
Seriali komedi – “The Bear”
“The Bear” është një ndër serialet më të mira që mund të kesh parë rishtazi, i cili sjell historinë e shefit Carmy Berzatto (i luajtur nga Jeremy Allen White). Ky serial, ndonëse cilësohet si komedi, sërish sjell një mori emocionesh, lotësh, situatash stresuese dhe njerëzore, si dhe një qasje brilante të një shefi, i cili përpos pasionit për kuzhinën, përfshihet në ngjarje të ndryshme që tregojnë karakterin dhe problemet e tij.
Për këtë serial, janë ngritur pretendime se nuk bën pjesë në kategorinë e “komedisë”, megjithëse, sipas ekspertëve të kinemasë, i ka përmbushur kriteret për të qenë pjesë e kësaj kategorie.
Por, duhet pranuar se seriali është një e mesme e artë dhe kalim goxha interesant mes zhanerash.
Mini-seriali, filmi apo antologjia – “Baby Reindeer”
Besojmë se e ke parë “Baby Reindeer”, por nëse nuk e mban mend, ose ende s’e ke parë, të tregojmë se duhet të përgatitesh për një mini-serial të fuqishëm, me ndjesi që nuk kapërcehen lehtë. Historia e vërtetë e Richard Gadd, një komedian që tentojë të pushtojë jetën e natës dhe të sjellë humorin në skena të ndryshme të bareve në Londër, përballet me një grua që e ndjek ngado. Emocionet e tij, ato më të fuqishmet dhe të ndërlikuarat, mblidhen për të na treguar një tjetër aspekt të dhunës, përndjekjes dhe dëshpërimit.
Listën e plotë të nominimeve e gjen këtu.
