Çështja e katër penale e ngritur kundër tij: Donald Trump dorëzohet në Atlanta
Donald Trump u dorëzua të enjten në burgun e Fulton County me më shumë se një duzinë akuzash që kanë lidhje me përpjekjet e tij për të ndryshuar rezultatet e zgjedhjeve në Georgia në vitin 2020, hera e katërt këtë vit që ish-presidenti përballet me akuza penale.
Trump kaloi pak më shumë se 20 minuta në burgun e Qarkut Fulton, ku më pas u lirua me kusht. Një fotografi e Trumpit u publikua menjëherë pasi ai u largua nga burgu.
Dorëzimi i Trump në Georgia shënon herën e katërt këtë vit që ish-presidenti iu dorëzua zyrtarëve lokalë ose federalë pasi u ngritën akuzat penale kundër tij.
Vladimir Putin konfirmon vdekjen e Yevgeny Prigozhin dhe thotë se biznesmeni kishte një "fat të vështirë"
Vladimir Putin ka konfirmuar vdekjen e Yevgeny Prigozhin, duke e quajtur shefin e mercenarëve të Wagner një "biznesmen të talentuar" me "një fat të vështirë".
Në një takim në Kremlin, presidenti rus foli për herë të parë për rrëzimin e avionit të Prigozhin, duke u shprehur ngushëllime familjeve të 10 personave në bord. Ai tha se Prigozhin ishte kthyer në Rusi nga Afrika të mërkurën dhe kishte takuar "disa zyrtarë", pa specifikuar se cilët.
Covid: Amerikanët këshillohen të mbajnë maska pasi u zbulua varianti i ri i koronavirusit
Autoritetet njoftuan se një variant i ri Covid-19 është zbuluar në SHBA, prandaj ekspertët mjekësorë po theksojnë se personat me rrezik të lartë duhet të rifillojnë vendosjen e maskave mbrojtëse për të parandaluar infeksionin potencialisht vdekjeprurës.
Qendrat Amerikane për Kontrollin dhe Parandalimin e Sëmundjeve (CDC) kanë thënë se shkencëtarët kanë zbuluar një variant të ri të koronavirusit, BA 2.86.
Zyrtarët thanë se "numri i madh i mutacioneve" të këtij varianti ka shkaktuar shqetësime se ai mund të shmangë imunitetin që sigurohet nga vaksinimi dhe infeksionet e mëparshme më shumë se variantet e tjera.
Claude Ruiz Picasso, djali i artistit spanjoll, ka vdekur në moshën 76-vjeçare
Claude Ruiz Picasso, djali i artistit spanjoll Pablo Picasso, ka vdekur në Zvicër në moshën 76-vjeçare, njoftoi avokati i tij të enjten. Avokati i Claude, Jean-Jacques Neuer, nuk dha detaje për shkakun e vdekjes.
Claude ishte fotograf dhe regjisor filmash, i cili gjithashtu menaxhoi pasurinë e babait të tij nga viti 1989 deri në korrik të këtij viti, kur ia dorëzoi përgjegjësinë motrës së tij më të vogël, Paloma.
Picasso kishte katër fëmijë. Claude dhe Paloma ishin fëmijët e tij me artisten franceze Françoise Gilot, e cila vdiq në qershor në moshën 101-vjeçare. Djali i tij i madh, Paul, nga martesa me balerinën Olga Khokhlova, vdiq në vitin 1975. Maya, vajza e tij me modelen franceze Marie-Therese Walter, vdiq në vitin 2022.
Pinguinët: mijëra zogj në Antarktidë ngordhin për shkak të niveleve të ulëta të akullit të detit
Mijëra pinguinë perandorë (lloj pinguini) në katër koloni në Antarktidë besohet se kanë ngordhur për shkak të niveleve të ulëta të akullit të detit. Analiza e imazheve satelitore tregoi ndarjen e akullit të detit dhe zhdukjen e kolonive në një kohë kur zogjtë nuk i kishin rritur ende pendët e tyre të papërshkueshme nga uji.
Shkencëtarët kanë thënë se pinguinët perandorë përballen me një të ardhme të pasigurt si pasojë e ngrohjes globale, sepse ata janë shumë të varur nga akulli i detit.
