Shkecëtarët do të analizojnë miliona skanime të trurit, duke përdorur inteligjencën artificiale, me qëllimin që të zhvillojnë një mjet për të parashikuar rrezikun e demencës te një person.
Studiuesit në universitetin e Edinburg dhe Dundee, do të ekzaminojnë skanimet e pacientëve nga Skocia, të cilat janë mbledhur në më shumë se 1 dekadë, si pjesë e një studimi global të quajtur “NEURii”. Ekipi do të përdorë inteligjencën artificiale për të përputhur të dhënat e imazhit me të dhënat që lidhen me gjetjen e modeleve që mund të ndihmojë mjekët të përcaktojnë më mirë rrezikun e një personi për të pasur demencë.
Numri i njerëzve në botë që kanë demencë parashikohet që deri në vitin 2050, të trefishohet, duke shkuar në 153 milionë. Studiuesit paralajmërojnë se paraqitet një kërcënim i madh i rritjes së shpejtë të kësaj sëmundjeje. Kostot shëndetësore dhe ato të kujdesit social për këtë sëmundje janë gjithashtu shumë të larta dhe tejkalojnë 1 trilionë dollarë në vit, thonë studimet.
Shkencëtarët synojnë krijimin e mjeteve digjitale që radiologët të mund t’i përdorin për skanimin e pacientëve, për të përcaktuar se sa rrezik kanë të preken nga demenca dhe për të diagnostikuar sëmundjen në fillesat e saj. Mjetet mund të ndihmojnë në përshpejtimin e zhvillimit të trajtimeve më të sakta për demencën, thonë ekspertët.
Profesori Emanuele Trucco, ekspert i inteligjencës artificiale, u shpreh:
“Ky grup i ri i të dhënave do të jetë i dobishëm për studiuesit neurologjikë. Nëse do të krijojmë një provë të suksesshme të konceptit, do të kemi një sërë mjetesh softuerike që janë të integruara pa problem me kontrollet rutinë të radiologjisë, që ndihmojnë në vendimmarrjen klinike dhe tregojnë rrezikun e demencës në hapat e saj të parë”.
Në këtë studim do të skanohen 1.6 milionë imazhe, me miratimin e panelit të përfitimit publik dhe privatësisë për kujdesin shëndetësor dhe social në Skoci. Të dhënat do të mbahen në arkivin e sigurt kombëtar në vend dhe do të ofrohet një platformë e sigurt e të dhënave elektronike për kërkime.
Profesori Will Whiteley, nga Qendra e Shkencave Klinike për Studimet për Trurin në Edinburg, u shpreh:
“Përdorimi më i i mirë i skanimeve të thjeshta të trurit për të parashikuar demencën do të çojë në një kuptim më të plotë të demencës dhe në një diagnozë që mund të gjejë në faza të hershme shkaqet e saj dhe nga ana tjetër, do të lehtësojë trajtimet e reja. Aktualisht, trajtimet për demencën janë të shtrenjta e të pakta. Nëse mund të mbledhim të dhëna nga një grup i madh njerëzish që kanë rrezik të lartë të preken nga demenca dhe që më pas, nëse japin pëlqimin e tyre për të marrë pjesë në testime, mund të fillojmë që të zhvillojmë trajtime të reja”.
Artikuj të sugjeruar:
