Le ta pranojmë që të gjithëve na pëlqen nga pak që të ankohemi tek të tjerët për ngarkesën e punës, lodhjen, stresin, detyrat e shumta që na ngarkohen dhe ajo ndjesia e ndarjes së kësaj bisede me të tjerët sikur jep një çlirim të plotë. Në fund të fundit, ankesat për punën gjatë gjithë kohës janë të padëmshme, por a ndikojnë ato në pjesën e karrierës suaj?
Sipas një studimi të ri nga universiteti i Georgia, të folurit shumë për stresin e punës, mund t'ju izolojë nga kolegët tuaj.
Studiuesit zbuluan se njerëzit që ankoheshin gjatë gjithë kohës, shihen nga të tjerët si më pak të aftë dhe të pëlqyeshëm. Madje, personat që morën pjesë në studim thanë se kishin më pak shanse që të ndihmonin një koleg/e që ankohej vazhdimisht për punën, në krahasim me të tjerët. Të kesh ngarkesë në punë është diçka që lidhet me natyrën e profilit tuaj, por nëse doni të ecni përpara në karrierë, sipas James Uffindell, drejtues i një rrjeti teknologjik në SHBA, ju duhet të ankoheni më pak.
"Nëse keni pasur një ditë sfiduese, mendoni se diçka është e padrejtë ose jeni të mbingarkuar nga një listë detyrash. Është e rëndësishme t'i përpunoni këto situata në mënyrë efektive," shpjegon Uffindell.
Kur mundeni, përpiquni të shmangni shfryrjen në vendin e punës dhe krijimin e një situate negative, pasi kjo mund të dëmtojë imazhin tuaj profesional dhe të çojë në probleme që lidhen me karrierën profesionale dhe shoqërore.
Në vend të kësaj, përqendrohuni në gjetjen e një zgjidhjeje më të mirë që nuk ndikon në aspektin produktiv të punës suaj. Sipas Uffindell, kur ndjeni dëshirën për t'u ankuar, një qasje shumë më e mirë do të ishte përdorimi i teknikave që zvogëlojnë stresin, një ecje në natyrë, një bisedë me menaxherët, një ndihmë nga kolegët etj.
Artikuj të sugjeruar:
