Djali dhe bashkëpunëtorët e aktorit të ndjerë, Robin Williams, kanë kujtuar komedianin legjendar në përvjetorin e humbjes së tij. Aktori i “Good Will Hunting”, “Aladdin” dhe “Dead Poets Society” ndërroi jetë nga vetëvrasja në moshën 63-vjeçare, më 11 gusht 2014, duke shokuar dhe pikëlluar të gjithë botën.

Zak (Zachary Pym), i biri i aktorit, publikoi një postim prekës në Instagram, ku u shpreh: “Babi, është e vështirë të besosh se kanë kaluar 10 vjet. Sot, reflektoj për dashurinë e pakufishme që ti ndave me të gjithë ne – me familjen, miqtë dhe të gjithë ata që takove. Ti vijon të më frymëzosh çdo ditë që të bëj çdo gjë të mundem dhe të krijoj një botë më të lidhur dhe të dashur për familjen tonë. Të dua, përgjithmonë”.

Edhe Jennifer Lopez rikujtoi aktorin e famshëm përmes një video nga filmi “Jack”, duke u shprehur se kanë shumë të përbashkëta.

Producenti George Schlatter u shpreh për People se Robin dhe ai ishin argëtuar shumë bashkë.

“Ai ishte intelektualisht më i informuar se unë, kishte më shumë histori, dije dhe kishte fjalor më të pasur se të gjithë. Një diskutim me Robin ishte emocionues, sepse nuk e dije kurrë se ku do shkonte biseda, pasi ai kishte aq shumë informacione. Truri i tij ishte plot me dije. Robin ishte më shumë se thjesht performues, ishte një eksperiencë”.

Ndërsa komediani Pauly Shore, i cili e njihte Williams qysh prej fillimit të karrierës së tij, u shpreh se aktori ishte special. “Thjesht shihni videot e vjetra. Të gjithë mund të dëshmojnë se ai ishte thjesht unik dhe i ka çuar aftësitë e tij në një tjetër nivel”.

Scott Weinger gjithashtu tha për People se prezenca e Williams e drithëronte, sepse nuk dinte se ç’të priste.

“Por ai ishte i qetë dhe sharmant. Ne shihnim tekstin e filmit “Aladdin”, flisnim me drejtuesit dhe kur në fund, fikeshin dritat e studios, një lloj magjie ndodhte. Robin ishte i mrekullueshëm, ishte i pabesueshëm në të dyja aspektet e tij: Në atë të qetësisë dhe në atë të gjeniut”.

Robin Williams është padyshim një prej aktorëve më të dashur të gjeneratës së tij. Ai, përmes roleve fantastike, na ka bërë të qeshim e të qajmë, duke u kthyer në një prej aktorëve më të vlerësuar.

Ai e nisi karrierën në San Francisco dhe Los Angeles, ku performonte stand-up komedi, gjatë viteve ’70. Më tej, mori shumë famë në komedinë “Mork & Mindy”, për të vijuar me filma të rëndësishëm si “Popeye”, ku fitoi edhe Oscar për Aktorin më të mirë në rol dytësor. Ai luajti edhe në filmin “Good Will Hunting”, një ndër filmat më të vlerësuar, si dhe u nominua për Oscar në filmat “Good Morning Vietnam”; “Dead Poets Society” dhe “The Fisher King”.

Gjatë periudhës së viteve 1970-1980, ai u bë i varur ndaj kokainës. Më tej, kur lindi i biri Zak, ai hoqi dorë, duke thënë se ishte një zgjim. Në vitin 2003, Williams nisi të konsumonte sërish alkool, teksa po punonte për filmin “The Big White”. Në vitin 2006, aktori u shtrua në një qendër rehabilitimi për t’u rikuperuar nga varësia.

Robin ishte 63 vjeç kur u gjet pa jetë në shtëpinë e tij në Paradise Cay, Kaliforni, më 11 gusht 2014. Në autopsinë e aktorit u gjet edhe shkaku i vdekjes: asfiksia nga varja. As alkooli dhe as përdorimi i drogës nuk ishin shkaqe të vdekjes. Në raport u shënua se aktori vuante nga depresioni dhe nga ankthi.