Në rrjetet sociale po qarkullon lëvizja #FreeNoizy dhe fansat e reperit kanë vendosur të organizojnë një protestë për lirimin e tij dhe që të mos ekstradohet në Kosovë. Menaxheri i tij, Ermir Gjyzeli, reagoi përmes një statusi në rrjetet sociale, ku falenderoi njerëzit për mbështetjen, por shtoi se nuk do të ndërmerret një organizim për asnjë protestë.

“Dje nëpërmjet mediave u informuam se do të organizohej sot një protestë para Ministrisë së Drejtësisë për lirimin e Rigelsit (Noizy-t). Duam të informojmë fansat e Noizy-t, publikun e gjerë dhe mediat se as familja e Noizy-t, as stafi menaxherial, nuk kanë ndërmarrë organizimin e asnjë proteste”, u shpreh ai.

Ai vijoi:

“Ne jemi në një proces gjyqësor dhe do të ndjekim vetëm rrugën ligjore për zbardhjen e së vërtetës dhe pastrimin e baltës mbi emrin e Noizy-t. Duam të falenderojmë përzemërsisht fansat dhe kolegët e Noizy-t për mbështetjen ndaj tij në këtë situatë absurde padrejtësie. Punë të mbarë të gjithëve atyre që po punojnë drejt të vërtetës”.

Noizy ishte shpallur në kërkim nga policia e Kosovës, për shkak të një sherri të ndodhur në Pejë, ku është dhunuar një tiktoker. Së bashku me Noizy-n është arrestuar edhe DJ Crax (Bahtjar Bajraktari).

Reperi akuzohet për veprën penale “lëndim i rëndë trupor”. Mendohet se ai, së bashku me grupin e tij dhe reperin Stresi, kanë dhunuar Medi Isenin, një person i famshëm në TikTok. Ngjarja ka ndodhur më 2 gusht në Pejë dhe që prej asokohe, është shpallur në kërkim nga policia e Kosovës. Pritet që reperi të ekstradohet në Kosovë.

Artikuj të sugjeruar: