Këshilli i Ministrave miratoi gjatë ditës së sotme (1 gusht 2024) orarin fleksibël për punonjësit e administratës publike. Adea Pinderi, ministre e Shtetit për Administratën Publike dhe Antikorrupsionin, njoftoi fashat orare për punonjësit e administratave.

Sipas ndryshimeve të reja në ligj, punonjësit e administratës do të punojnë për 8 orë e 30 minuta nga e hëna-të enjte dhe 6 orë gjatë ditës së premte. Ata duhet të jenë prezentë në orarin e punës gjatë fashës orare 9:30-15:30, ndërsa pjesën e mbetur të orëve të punës mund ta kryejnë më herët ose m vonë, pra, me orare fleksibël. Ndryshimet do të aplikohen për 185,696 punonjës të administratës publike.

“Sot në mbledhjen e Këshillit të Ministrave miratuam një vendim për rregullat e kohëzgjatjes së punën dhe pushimit, orët shtesë dhe kompensimin e tyre në institucionet e administratës shtetërore, institucionet e pavarura dhe njësitë e qeverisjes vendore. Kjo është një nisma e ndërmarrë, në kuadër të rienergjizimit të administraëts publike për të injektuar elemente të fleksibilitetit në punë dhe për të garantuar që administrata publike të jetë një punëdhënës më tërheqës”, thuhet në deklaratën e Pinderit.

Më tej, ajo vijon:

“Në kuadër të kësaj iniciative parashikohet për herë të parë në legjislacion koncepti i orëve fleksibël të punës për të garantuar një balancë më të mirë mes punës dhe jetës private të të gjithë punonjësve brenda administratës shtetërore. Në bazë të këtij vendimi parashikohet shprehimisht që ndërkohë që kohëzgjatja ditore e punës mbetet e njëjta, pra, nga e hëna në të enjte 8 orë e 30 minuta, ndërsa ditën e premte 6 orë, punonjësit e administratës publike mund të zgjedhin ta nisin ditën e punës me herët dhe ta përfundojnë më vonë, ose ta nisin më vonë dhe ta përfundojë më vonë, duke garantuar që të gjithë punonjësit janë prezentë në zyrat e tyre në një fashë orare nga 09:30-15:30, nga e hëna në të enjten dhe nga ora 09:30-13:00 ditën e premte”.

Ajo njoftoi edhe se ndryshimet në Kodin e Punës për dhënien e lejeve, të cilat do të jepen nga drejtuesi i burimeve njerëzore:

“Në lidhje me autoritetin përgjegjës për dhënien e lejeve, kjo e drejtë mund të delegohet nga drejtuesi i institucionit ose nga Sekretari i Përgjithshëm te drejtuesi i burimeve njerëzore. Në ndryshimet e Kodit të Punës është hequr kufizimi sipas të cilit punonjësit e administratës publike nuk mund të merrnin leje vjetore në një kohëzgjatje më pak se një javë kalendarike. Është përcaktuar shprehimisht që kohëzgjatja është 22 ditë pune, ku janë shtuar dhe 2 ditë pushim për të gjithë punonjësit”, përfundoi ajo.

Artikuj të sugjeruar: