Kosovë/ Dënohet me burgim të përjetshëm Dardan Krivaqa, djali që vrau Marigona Osmanin

Gjykata Themelore e Ferizajt ka dhënë vendimin për të dënuar me burigm të përjetshëm Dardan Krivaqën, vrasësin e Marigona Osmanit. Ajo u vra në mënyrë të tmerrshme, pasi u përdhunua prej disa orësh nga autorët. Më pas, u la në derën e një spitali, ku gjeti vdekjen nga plagët e rënda.

Bashkë me të u dënua edhe Arbër Sejdiu, me 15 vjet burg, për ndihmesën që dha në rrëmbimin dhe kryerjen e vrasjes. Rasti tronditi asokohe Kosovën, duke sjellë reagime të shumta të njerëzve të thjeshtë e të famshëm, si dhe protesta të shumta në mbarë vendin.

Turqi/ Erdogan godet me shpullë një fëmijë, pasi nuk i puthi dorën

Në rrjetet sociale është bërë viral një moment ku presidenti turk, Recep Tayyip Erdogan, ka goditur me shpullë një fëmijë të vogël, pasi ai nuk i puthi dorën gjatë ceremonisë për inaugurimin e shtëpive të rindërtuara. Ngjarja ndodhi në provincën Rize dhe menjëherë momenti u shpërnda në rrjetet sociale.

Në video shfaqet presidenti turk duke i dhënë çelësat e shtëpive të rindërtuara familjarëve. Dy fëmijë u ngritën në skenë kur ai mbaroi fjalimin dhe presidenti u afroi dorën për ta puthur. Njëri nga djemtë nuk ia puthi dorën dhe Erdogan e goditi me shuplakë. Sipas raportimeve të mediave, djaloshi i puthi dorën dhe më pas, presidenti u dha të dyve djemve para.

SHBA i ofron ndihmë Ukrainës

SHBA do të vijojë me mbështetjen e saj ndaj Ukrainës, duke i dhënë kësaj të fundit dy paketa të reja ndihme ushtarake, me vlerë që shkojnë deri në 1.7 miliardë dollarë. Sipas John Kirby-t, zëdhënësit të Këshillit të Sigurisë Kombëtare të Shtëpisë së Bardhë, paketa do të përfshijë pajisje mbrojtjeje dhe sulmi, si dhe raketa e antitanke.

Këto ndihma do ta ndihmojnë Ukrainën në mbrojtjen ajrore kundrejt sulmeve ruse, të cilat janë gjithnjë duke u shtuar. Megjithatë, edhe Ukraina po kundërpërgjigjet, pasi gjatë ditës së djeshme ka kryer një sërë sulmesh me dronë në Rusi.

Britani e Madhe/ Arrestohet 17-vjeçari që plagosi me thikë 8 persona

Një 17-vjeçar është arrestuar, pasi plagosi me thikë 8 njerëz në Southport, Britani e Madhe. Adoleshenti u kap nga policia e Merseyside dhe do të qëndrojë në paraburgim, për t’u marrë në pyetje nga hetuesit dhe për të zbuluar motivin që e shtyu të bënte një sulm të tillë.

Deri më tani është konfirmuar se incidenti nuk po trajtohet si një ngjarje e natyrës terroriste dhe djali është i vetmi i arrestuar për sulmin me thikë dhe po punohet dhe hetohet më tej për zbardhjen e rrethanave të ngjarjes.