Pas më shumë se dy vitesh nga transmetimi i sezonit të fundit të “Euphoria”, produksioni i sezonit të tretë pritet të fillojë në janar 2025. Por, ndërsa pritja ka qenë e gjatë, dëshira për më shumë “Euphoria” ka rënë.

Që nga transmetimi i sezonit të dytë në janar 2022, shumë gjëra kanë ndryshuar. Suksesi i jashtëzakonshëm i yjeve të serialit, si Zendaya dhe Sidney Sweeney, ka ngritur profilin e tyre në mënyrë të dukshme, duke bërë që të angazhohen në projekte të tjera të mëdha dhe të bëhen figura të njohura në Hollywood. Për shembull, Zendaya është bërë një nga aktoret më të kërkuara (fama e së cilës është gjithnjë në rritje), me role në filma të mëdhenj si “Challengers” dhe “Dune 2”. Sidney Sweeney, ndërkohë, ka luajtur në filmin “Anyone But You”.

Humbja e aktorit shumë të dashur për shikuesit, Angus Cloud, i cili luante rolin e Fezco, ishte një goditje e rëndë për fansat e serialit. Vdekja e tij, jo vetëm që i hidhëroi të gjithë, por edhe ngriti pyetje të rëndësishme për të ardhmen e karakterit të tij dhe vijimin e serialit.

Në vitin 2023, Sam Levinson, krijuesi i “Euphoria”, u përfshi në një debat të madh lidhur me serialin e tij të ri “The Idol”. Ky serial, i cili u përball me kritika të ashpra për përmbajtjen e tij seksuale dhe të papërshtatshme, ngjalli dyshime për trajtimin që Levinson u bënte personazheve edhe në “Euphoria”. Aktorja e Kat, Barbie Ferreira në gusht të vitit 2022, tregoi që nuk do të rikthehej më për një sezon të tretë.

Duke marrë parasysh të gjithë këta faktorë – humbjen e aktorit, polemikat me Levinson dhe ndryshimet në karrierat e aktorëve kryesorë – pyetja mbetet: “A e pret më njeri me entuziazëm “Euphoria-n”? Ndërsa produksioni përgatitet të rifillojë, do të jetë interesante të shihet se si seriali do të adresojë këto sfida dhe nëse do të mund të rikthejë pasionin e fansave.

Nëse seriali do të mundet të rikthejë magjinë e tij të mëparshme, kjo mbetet për t'u parë. Për momentin, ne presim që të shohim se si do të zhvillohet ky kapitull i ri.

Artikuj të sugjeruar: