Zakonisht, dëshirojmë që kolesteroli ynë të jetë i ulët - idealisht më pak se 150 miligramë (mg) për decilitër (dL).
HDL-ja konsiderohet si kolesteroli “i mirë”. LDL-ja, nga ana tjetër, është kolesteroli “i keq” sepse grumbullohet në arteriet tuaja dhe mund të kontribuojë në rrezikun për sëmundje të zemrës dhe goditje në tru. Trigliceridet, një tjetër lloj yndyre në gjak, janë të lidhura me rrezik më të lartë për sulm në zemër dhe goditje në tru nëse keni gjithashtu HDL të ulët ose LDL të lartë.
Do të dukej logjike që, për të mbrojtur zemrën tuaj, do të dëshironit të rrisni kolesterolin tuaj të mirë, ose HDL. Por hulumtimet që kanë ekzaminuar rritjet në HDL, deri më tani, nuk kanë treguar ndonjë zvogëlim në problemet e zemrës dhe gjithashtu, ilaçet që rrisin HDL-në e mirë nuk i parandalojnë këto rreziqe.
“Që nga vitet 1970, studimet e popullatave të mëdha treguan se njerëzit që kishin nivele shumë të ulëta të kolesterolit kishin një rrezik më të lartë për sulme në zemër,” - thotë Dr. Anand Rohatgi, një kardiolog akademik dhe profesor i mjekësisë në kardiologji në "UT Southwestern Medical Center".
“Është një “parashikues i rëndësishëm i rrezikut,” thotë ai, prandaj HDL-ja e ulët e bën atë një përllogaritës të rrezikut për sëmundje të zemrës, por nuk përkthehet me patjetër në një domosdoshmëri trajtimi. Pra, nga një këndvështrim mjekësor, nuk është një objekt trajtimi; është një tregues i rrezikut. “Në vend që të fiksoheni në ndonjë aspekt të vetëm të kolesterolit, duhet të mendoni për parametrat e tjerë si tregues të rrezikut për problemet e zemrës si: mosha, seksi, presioni i gjakut dhe diabeti", - shprehet ai.
Zakonet më poshtë janë të gjitha të lidhura me nivele më të larta të HDL-së, si dhe përfitime të tjera për zemrën tuaj dhe shëndetin e përgjithshëm.
Ushtrohuni më shumë
Një mënyrë jetese sedentare është e lidhur me një sërë problemesh shëndetësore, duke përfshirë një mundësi më të madhe për sëmundje të zemrës. Aktiviteti fizik është treguar vazhdimisht se rrit nivelet e HDL-së dhe gjithashtu, është i lidhur me një jetë më të gjatë dhe më pak gjasa për sëmundje të zemrës.
"Synoni për rreth 30 minuta në ditë, pesë ditë në javë", - thotë Dr. Melissa Tracy, kardiologe dhe drejtoreshë e sektorit të rehabilitimit kardiak në "Rush University Medical Center". Mund të jetë çdo formë e ushtrimeve kardio, ecje e shpejtë, kërcim, not, çiklizëm, ose çdo gjë tjetër që ju pëlqen dhe do e praktikoni, për sa kohë që rrit mirëqënien tuaj.
Konsumoni yndyrna të shëndetshme për zemrën
“Të konsumosh ushqime që janë të pasura me yndyra të pangopura dhe anti-oksidantë mund të përmirësojë raportin HDL ndaj LDL,” - thotë Dr. Joy M. Gelbman, kardiologe në "Weill Cornell Medicine".
Zgjidhni opsione si vaji i ullirit dhe peshku yndyror mbi ushqimet më të pasura me yndyra të ngopura si mishi i kuq, produktet e qumështit me yndyrë të plotë, ushqimet e skuqura dhe produktet e pjekura.
Bërja e zgjedhjeve më të shëndetshme në dietë në përgjithësi do të thotë që trupi juaj nuk do të ruajë aq shumë yndyrë. Do të përdorni rezervat tuaja të yndyrës për një pjesë të energjisë suaj, gjë që ndihmon trupin tuaj të metabolizojë kolesterolin më mirë.
Lini duhanin
Duhani jo vetëm që ul HDL-në tuaj; gjithashtu bën që HDL-ja që keni të jetë më pak efektive në punën e saj mbrojtëse. Lënia e duhanit mund të rrisë HDL-në tuaj brenda disa javësh, sipas një meta-analize në "Biomarker Research".
Ekspertët nuk e dinë saktësisht pse kjo ndodh, por mund të ketë të bëjë me mënyrën se si duhani streson trupin, sipas studimeve të deritanishme.
Humbisni peshën e tepërt
Ushtrimi, humbja e peshës te njerëzit që janë mbipeshë dhe lënia e duhanit janë mjetet kryesore për optimizimin e HDL-së. Nëse keni obezitet arritja e një peshe më të shëndetshme mund të ulë trigliceridet dhe LDL-në tuaj dhe të rrisë HDL-në.
Dhe humbja e peshës nuk duhet të jetë dramatike: Njerëzit që humbën vetëm 1-3% të peshës së tyre trupore treguan përmirësime më të mira në HDL se sa njerëzit që humbën vetëm 1% të peshës së tyre trupore në një studim të "Obesity Research & Clinical Practice".
Zakonet e shëndetshme për zemrën kanë përfitime shtesë pavarësisht nga efekti i tyre në kolesterolin tuaj, siç janë rritja e jetëgjatësisë, përmirësimi i shëndetit kardiovaskular dhe mirëqënies suaj në tërësi.
Artikuj të sugjeruar:
