Shelley Duvall, aktorja me sy të mëdhenj dhe me një talent fantastik në aktrim, ka ndërruar jetë në moshën 75-vjeçare. Lajmin e konfirmoi partneri i saj, Dan Gilroy dhe shkaku i vdekjes mendohet se ishin ndërlikimet nga diabeti.

“Partnerja dhe mikja ime e dashur, e ëmbël dhe e mrekullueshme na la mbrëmjen e kaluar. Shumë vuajtje ka pasur rishtazi, por tani është e lirë. Fluturo lart, e bukura Shelley”, u shpreh Gilroy.

Duvall njihet për disa role, duke nisur nga “Brewster McCloud”; “McCabe & Mr. Miller”; “Thieves Like Us”; “Nashville”; “3 Women”; “Annie Hall” dhe sigurisht, një ndër rolet më të famshëm, ai i “The Shining”, i cili është ndoshta filmi më sfidues në karrierën e saj.

Shelley Alexis Duvall lindi më 7 korrik 1949 dhe njihet për bashkëpunimet e saj me Robert Altman. Ajo është kandiduar për disa çmime, si British Academy dhe Primetime Emmy. Shelley ka lindur në Teksas dhe talenti i saj u zbulua nga regjisori Altman, i cili u befasua nga talenti i saj.