Zgjidhet Sekretari i Përgjithshëm i NATO-s

Është përzgjedhur Sekretari i Përgjithshëm i NATO-s, pasi vendet e aleancës ranë dakord. Mark Rutte, kryeministri holandez në largim është emëruar në detyrën e re, pasi Rumania dakordësoi në mbështetjen e kandidaturës së tij. Rutte do të drejtojë aleancën në disa vite të vështira, për shkak të luftës në Ukrainë dhe kërcënimit të vazhdueshëm nga Rusia.

Sekretari i Përgjithshëm, Jens Stoltenberg do të largohet nga detyra pas 10 vitesh. Ndërsa Rutte, sapo të marrë detyrën, do të mund ta drejtojë aleancën e NATO-s për të paktën 4 vitet e ardhshme.

Ukrainë/ Nis rekrutimi i të burgosurve në ushtri

Ushtria ukrainase synon të rrisë numrin e ushtarëve në frontin e luftës gjatë muajve të ardhshëm. Për këtë, po përpiqet të rekrutojë ushtarë të rinj dhe ka nënshkruar një kontratë me të burgosurit ukrainas. Rreth 3,000 djem e burra që vuajnë dënimin në burgjet ukrainase janë regjistruar dhe pritet t’i bashkohen ushtrisë të vendit.

Ish-të burgosurit janë duke u trajnuar në një kamp në rajonin e Dnepropetrovsk. Kjo nevojë për rekrutë të rinj vjen sepse Ukraina ka pësuar humbje të shumta gjatë muajve të fundit, pasi Rusia ka rritur sulmet e saj në zona të ndryshme të vendit të pushtuar.

Hezbollah paralajmëron Libanin

Hassan Nasrallah, udhëheqësi i grupimit terrorist Hezbollah në Liban ka paralajmëruar Izraelin, duke thënë se nuk do të ketë një territor të sigurt në këtë vend dhe se Hezbollah tanimë ka armë të reja. Sipas tij, Hezbollah ka synime të qarta dhe një gamë të gjerë objektivash.

Izraeli dhe Hezbollah, aleat i Hamasit, shpeshherë kanë sulmuar njëri-tjetrin qysh prej tetorit të vitit të kaluar, gjatë luftës në Gaza. Në Liban, në 8 muaj, kanë mbetur viktima më shumë se 400 njerëz, ndër ta 80 civilë. Edhe Izraeli ka pësuar humbje, pasi 16 ushtarë dhe 11 civilë janë vrarë gjatë luftimeve.

Mbappe rikthehet në stërvitje

Mbappe u rikthye në stërvitje për përfaqësimin e skuadrës kombëtare të Francës, pasi pësoi thyerje të hundës në ndeshjen kundër Austrisë. Aksidenti i Mbappe-s shqetësoi adhuruesit e futbollit, të cilët menduan se ylli francez do të humbte pjesëmarrjen në Euro 2024.

Megjithatë, Kylian Mbappe i ka qetësuar të gjithë me rikthimin e tij përmes një postimi në Instagram, ku shprehet se pa rreziqe nuk ka fitore.