Më shumë se 1.2 milion refugjatë janë larguar nga Ukraina, thonë Kombet e Bashkuara
Sipas të dhënave të OKB-së, më shumë se 1.2 milionë refugjatë kanë lënë Ukrainën që nga dita e parë e sulmit rus që nisi në 24 shkurt. Nga 1,209,976 refugjatë, më shumë se gjysma kanë shkuar në Poloni e ndërsa pjesa tjetër në vendet fqinjë si Hungaria, Polonia, Sllovakia, Moldavia dhe Rumania.
Rreth 1 milionë u larguan që në javën e parë të sulmeve, e ndërsa shumë të tjerë janë "janë në lëvizje si brenda dhe jashtë vendit".
Elon Musk refuzon të bllokojë propagandën ruse nga Starlink
Përmes një statusi në Twitter, Elon Musk tha se zyrtarë të qeverive të huaja i kanë kërkuar kompanisë së tij të internetit satelitor, Starlink "të bllokojë lajmet ruse", si masë kundër sulmit që po ndodh në Ukrainë.
"Ne s'do ta bëjmë këtë për aq kohë sa nuk do të jemi nën kërcënimin e armëve. Më vjen keq, por unë jam në mënyrë absolute pro fjalës së lirë."
Nuk është e qartë se cila qeveri i ka bërë një kërkesë të tillë kreut të Tesla-s, por ai shtoi se nuk ka qenë vetë Ukraina.
Për ç'lloj propagande bëhet fjalë?
Çdo lajm që vjen nga media ruse, deklaratat e presidentit Putin, etj.
Zelensky drejtuar Europës: "Nëse ne biem, ju bini!"
Presidenti ukrainas Volodymyr Zelensky falenderoi sërish komunitetin global për mbështetjen dhe ndihmën e treguar prej 9 ditësh, që nga momenti i sulmit rus.
“Sot, ne jemi të gjithë ushtarë. Disa prej nesh janë ushtarakë, që i shërbejnë vendit tonë në ushtri. Të tjerët po shërbejnë si mjekë, të tjerë po punojnë për të mbrojtur fëmijët dhe familjet e tyre. Kjo është zemra jonë, zemra e Ukrainës, duke qëndruar së bashku kundër së keqes”.
Ndër të tjera ai iu bëri thirrje europianëve që të vazhdojnë të japin mbështetjen e tyre pasi në këtë pikë, të gjithë "jemi ukrainas".
“Përkrahni luftën tonë, sepse nëse Ukraina nuk do të qëndrojë, Europa nuk do të qëndrojë. Nëse ne do të biem, ju do të bini. Të gjithë ju sot jeni ukrainas."
Presidenti siguroi gjithashtu se vazhdon të jetë në vend dhe se nuk ka ndërmend të largohet prej Ukrainës, sikundër pretendojnë lajmet nëpër media.
Sekretari amerikan i Shtetit thotë se luftën mund ta fitojë Ukraina
Antony Blinken, sekretari amerikan i shtetit është shprehur për BBC se është i bindur që Ukraina do ta fitojë luftën kundër rusëve.
Blinken tha se nuk mund të thotë me siguri sa do të zgjasë lufta, por këmbënguli se disfata e Ukrainës nuk ishte e pashmangshme. Teksa vlerësonte popullin ukrainas për trimërinë dhe vendosmërinë dhe tha se pret që “me kalimin e kohës” të bëhet e qartë se Moska nuk mund t’ia nënshtrojë këtij populli, vullnetit të saj.
“Nëse synimi i Moskës është që të përpiqet disi të rrëzojë qeverinë dhe të instalojë regjimin e saj kukull, 45 milionë ukrainas do ta refuzojnë këtë në një mënyrë ose në tjetrën”.- përfundoi ai duke shtuar se shqetësimi i SHBA dhe vendeve perëndimore për rrezikun e përshkallëzimit mbetet real.
Burimi: CNN, BBC
