Tayna publikoi këngën e saj të re "Vetëdija", e cila për pak orë u hoq nga YouTube dhe për momentin nuk mund të dëgjohet më. Artistja bëri menjëherë një reagim në Instagram, ku fajësoi ish-menaxherin e saj, Rinor Hykollin, duke e etiketuar si “mjeran”.

“Unë, për mua jam e Para! Për vite kam punuar shumë në çdo disponim të mundshëm, në çdo gjendje emocionale/shpirtërore/shëndetësore, pa u dorëzuar kurrë e ndërkohë, këto vite, të tjerët i kanë shijuar lehtë rezultatet e suksesive të mua, të cilat i bënë ata me ‘shtëpi’. Por shtëpia ime nuk kishte rëndësi. Shëndeti i familjarëve të mi vazhdon të mos ketë rëndësi për ta”, u shpreh Tayna në postimin e saj në Instagram.

“Në heshtjen e shumë njerëzve mësova shumëçka. Ashtu si mbreti Artur, me shpatën e së vërtetës, dinjitetit dhe respektit për veten dhe të gjithë njerëzit që një zemër e kanë, dal me kraharorin hapur dhe bërtas: “Nuk bëhet dot njeriu i madh, as me para, as me famë, as me ligësi!” Ti je njeri i vogël kur vjen në këtë tokë për të vuajtur suksesin që kurrë s’ia ndjeve aromën. Ke ardhur për t’u kacavjerrë në xham, ashtu si një kërmill pas shiu. Po unë, do të të vrojtoj me durim, sepse unë jam e madhe…”.

Mandej, ajo u kërkoi ndjesë dëgjuesve për videon e hequr nga YouTube: “U kërkoj ndjesë dëgjuesve të mi për videon e hequr, por unë e di që do më kuptoni e bashkë me mua, do bëni durim para mjeranëve, të cilët nuk lënë një rast t’u ikë pa treguar sa të vegjël janë! Unë ia kam lënë në dorë drejtësisë dhe Zotit”.

Ç’ka ndodhur mes Tayna-s dhe Rinorit?

Në fakt, më parë, dyshja ka pasur një marrëdhënie shumë të mirë. Ai ka qenë pjesë e rrugëtimit të këngëtares dhe ngjitje së saj në karrierë, qysh prej fillimit. Ai dhe Tayna kanë bashkëpunuar që prej vitit 2016.

Në vitin 2018, Tayna ka pasur edhe një zënkë me ish-të dashurën e Rinorit (sipas thashethemeve), e cila ka folur edhe për konfliktin e tyre.

Si nisi? Reperja publikoi një foto, ku shkroi: “Mami e bonën bajat krejt t’u e përdor, prej këtij momenti thirrëm “Njerkë”, sepse unë mund të ta marr karrierën dhe burrin gjithashtu.”

Më pas, Arta i ktheu përgjigje, duke thënë: “Qetësohu ‘Njerka’ ke të drejtë, do jesh përherë e dyta! Ti ke famën, por ai t’i merr paratë, unë i kam pasur që të dyja!”

Më tej, në një intervistë për “Mirage”, Arta tha se Rinori ka mbajtur anën e saj në zënkën me Tayna-n, duke fshirë foton e kësaj të fundit nga Instagram-i.

Arta tregoi se e ka njohur Rinorin përpara se ai të ishte menaxher, çka la të kuptohej se ka pasur shumë më shumë se miqësi mes tyre. Këngëtarja ka shtuar se fill pas zënkës më Tayna-n, menaxheri e ka telefonuar dhe është përpjekur ta bindë për të fshirë postimin. Pasi Arta zgjodhi të mos i përgjigjet telefonatës së tij, sipas saj, Rinori ka telefonuar familjarët e saj, por sërish, Arta nuk e ka fshirë postimin.

“E kam nisur karrierën 3 vjet më herët se Tayna. Nuk ka arsye për të folur për karrierën time apo të dikujt tjetër. Së pari, unë nuk hyj në zhanrin e Tayna-s që të krahasohet me mua ose të më thumbojë me ndonjë foto kur unë as që e kam marrë nismën të shkruaj për të. Mami do të ketë para meje, para Tayna-s, pas meje, pas Tayna-s. Njerëzit nuk i duan njerkat, duan mamatë! Unë kurrë nuk jam kapur me këngëtarë të tjerë për famë, sepse fama që vjen shpejt, bie shpejt”, u shpreh ajo asokohe.

Gjatë këtij viti, Tayna i ndërpreu marrëdhëniet e saj me menaxherin. Sipas medias kosovare “Paparaci”, kjo ka ndodhur për shkak se Rinori ka bërë një nënshkrim të rremë me kompaninë Sony, që lidhej me menaxhimin e kontratës.

Më pas, burimet për “n’Zoom” thanë se çështja përfundoi në gjyq dhe kjo ndikoi edhe në karrierën e këngëtares, e cila pati një pauzë të gjatë në muzikë. Thuhet se për një periudhë të pacaktuar, ajo nuk mund të publikojë këngë, pasi Rinori ka të drejtën t’i bllokojë ato, sipas kontratës së nënshkruar. Duke qenë se detajet për çështjen gjyqësore janë të cunguara, nuk dihet një informacion më i hollësishëm.