Këngëtarja duket e vendosur për të ruajtur me çdo kusht privatësinë e saj dhe të familjarëve që e shoqërojnë në aktivitete të ndryshme.

Kështu, një video po qarkullon në platformën X (ish-Twitter) këngëtarja 38-vjeçare shihet duke u përplasur verbalisht me disa njerëz që po e ndiqnin me telefon në dorë për ta regjistruar atë dhe familjarët e saj teksa ata shijonin kryeqytetin francez, Parisin.

"Mos," dëgjohet në video Del Rey që i bërtet një personi të panjohur, madje tenton që t’i marrë edhe telefonin nga duart. “Më ke ndjekur mua dhe familjen time...Largohu nga unë!”

Teksa, artistja përpiqet që të normalizojë situatën për t’u larguar nga një grumbull njerëzish, ajo shton se veprime të  tilla janë shumë të panevojshme. “Mos më ndiqni më! Mos më ndiqni më!” shton ajo.

“Jam e mërzitur! Mos i lini njerëzit të më ndjekin. Unë kam vetëm një ditë për të kaluar në Paris, në fakt janë vetëm katër orë. Punoj çdo ditë të jetën sime dhe dua t’i shijoj për vete dhe familjen time këto orë,” shton këngëtarja, teksa flet me ndihmësit e saj.

"Ajo u përpoq të ndalonte një përndjekës të frikshëm,” shkruan një përdorues i X.

“Disa nga admiruesit tuaj po shkojnë shumë larg. Respektoni privatësinë dhe hapësirën e saj personale sepse është kaq e rëndësishme edhe për të famshmit,” shton një tjetër.  

Lana Del Rey i ka quajtur këta persona thjesht “përndjekës” dhe ka marrë dukshëm miratimin virtual nga ndjekësit në faqen e saj në Instagram.

Artikuj të sugjeruar: