Nëse e ke parë “Baby Reindeer”, e di për çfarë e kemi fjalën. Nëse jo, pasi të lexosh këtë artikull nise! Fiona Harvey, gruaja që pretendon se është “Martha e vërtetë”, e cila përndjek komedianin Richard Gadd, ka hedhur në gjyq Netflix dhe kërkon një dëmshpërblim prej 170 milionë dollarësh.
Fiona bëri padinë duke e akuzuar Netflix për keqinformim, shkaktim stresi emocional, neglizhencë dhe dhunimin e të drejtës së saj.
Në serial, Martha (rol i luajtur nga Jessica Gunning) fiksohet pas një komediani që është duke punuar fort për të arritur të ketë famë në stand up-e dhe jo vetëm (i luajtur nga Richard Gadd, krijuesi i serialit dhe viktima e vërtetë e përndjekjes).
Në padi nënvizohet se gënjeshtra të shumta u thanë për personalitetin e Harvey-t dhe ato u panë nga mbi 50 milionë njerëz në mbarë botën. “Ata i thanë këto gënjeshtra, nuk u ndalën kurrë, sepse historia e trilluar ishte më interesante se e vërteta dhe këto histori bëjnë më shumë para”.
Padia gjithashtu thekson se fakti që në fillim të serialit shkruhet “Kjo është një histori e vërtetë”, i shtyn njerëzit të mendojnë se çdo detaj i historisë është i vërtetë.
Fiona pretendon se Netflix ka treguar “neglizhencë të madhe”, pasi lejoi njerëzit në internet që të përdorin të dhënat që morën nga seriali për të gjetur identitetin e saj. Ajo thotë se Netflix dhe Gadd ishin të vetëdijshëm për rrezikun, por megjithatë, vazhduan dhe treguan indiferencë ndaj të drejtave, sigurisë dhe/ose mirëqenies së saj. “Portretizimi në “Baby Reindeer” e ka bërë znj. Harvey të torturohet dhe të vuajë nga një shqetësim i rëndë dhe esktrem emocional”, thuhet në padi, duke shtuar se ajo po përjeton ankth, sulme paniku, turp, depresion, dhimbje stomaku, frikë, humbje oreksi dhe të gjitha këto janë shkaktuar nga gënjeshtrat e publikuara në “Baby Reindeer”.
Fiona po kërkon një minimum prej 170 milionë dollarësh dëmshpërblim kompensues dhe ndëshkues, plus edhe fitimet e serialit, pasi pretendon se “Netflix dhe Gadd i shkatërruan reputacionin, karrierën dhe jetën”.
Ndërkohë, një përfaqësues i Netflix ka reaguar për Page Six, duke thënë se synohet të mbrohet deri në fund e drejta e Richard Gadd për të treguar historinë e tij.
Fiona Harvey, me profesion avokate, mohoi ta ketë përndjekur dhe sulmuar seksualisht Gadd gjatë një interviste për emisionin e Piers Morgan. Gjithsesi, një tjetër avokate, e quajtur Laura Wray, tha për Piers Morgan se ajo ka qenë gjithashtu “fiksimi kryesor” i Harvey-t për disa vite, duke shtuar që qysh prej momentit që e pa serialin, e kuptoi se për kë bëhet fjalë.
“Aktorja bëri një punë shumë të mirë. Tingëllon si ajo, duket si ajo…Unë kam një dosje plot me letra që m’i ka dërguar Fiona, bashkë me email, faks e kështu me radhë, dhe të gjitha janë identike”, u shpreh Laura.
Artikuj të sugjeruar:
