E dimë që mund të jesh marrosur nga Festivali i Filmit në Kanë, por ka edhe një Festival fantastik për artin që do të zhvillohet në Shkodër, për plot 5 ditë. Nga data 5-9 qershor, Shkodra mirëpret filmat eksperimentalë, video artistike, ekspozita, takime, workshop-e, performanca muzikore, të cilat do të të përcjellin qindra ndjesi.
Përmes këtij festivali, të krijuar nga Adrian e Melisa Paci, do të kesh mundësinë të shohësh projekte interesante dhe këndvështrimet fantastike të regjisorëve dhe artistëve, të cilët do të transmetojnë në një ekran gjigant veprat e tyre.
“Ekrani i Artit” tanimë është një traditë në Shkodër dhe ky është edicioni i VII i tij. Me një sërë aktivitetesh që do ta mbajnë publikun pezull, ky festival rreket të sjellë tek admiruesit e artit një tjetër qasje më të prekshme në zhanera të ndryshëm dhe në ndjesitë që veç bota e artit dhe e kinemasë mund të dhurojë.
Në këtë event të jashtëzakonshëm do të gjesh:
Ekspozita “Letra” nga Nora Bzheta, e kuruar nga Xhulian Millaj dhe Elsamina Musiq. Kjo ekspozitë çelet më 5 qershor dhe do të qëndrojë e hapur për të gjitha ditët e festivalit, nga ora 11:00-18:00, në “Art House”.
Kinemaja “Republika” mirëpret ekspozitat e Driant Zenelit - “Those Sweet Murky Waters” dhe atë të Roland Sejkos – “Acqua, porta via tutto”.
Një tjetër event që nuk duhet ta humbësh? Programin me video të kuruar nga Ajola Xoxa, e cila do të prezantojë “Long Sorrow” nga Anri Sala; “Untitled” nga Lek M. Gjeloshi dhe “Tools for conviviality” nga Anna Ehrenstein.
Në ditën e dytë të festivalit do të kesh mundësinë të shohësh “Personal narratives, family myths”, një ekspozitë fantastike, si dhe të bekohesh nga muzika e mirë. Më tej, ekspozita “Rumours” me vepra të Robert Pettena, Michala Julinyova, Priscilla Lucena, Kristanja Çene, Enxhi Mehmeti do të të mahnisë në “Galerinë e Arteve”.
Gjithashtu, do të njihesh me filmat fitues së Concorto Film Festival, si dhe filmin “Pavijoni Shqiptar”, një vepër nga Iva Lulashi dhe Antonio Grulli, e cila është prezantuar në edicionin e 60-të të Bienales së Venecias.
Sigurisht, programi ka filma të shkurtër, shfaqje filmike, ekspozita të krijuara nga nxënës e artistë të njohur, bashkëbisedime e shumë surpriza që mezi presim që t’i zbulojmë. Ah, edhe muzikë dhe vibe shuuumëëë të mirë.
Mos e humb shansin për të parë një festival mbresëlënës!
Nga 5-9 qershor, takohemi n'Shkodër!
