Lufta e karteleve në Meksikë detyron njerëzit të braktisin shtëpitë
Qindra banorë janë detyruar të largohen nga shtëpitë e tyre në zonën e Kiapas, në jug të Meksikës. Shkaku i kësaj zhvendosjeje është lufta mes bandave dhe karteleve në Meksikë, e cila është goxha agresive.
Dy kartele rivale po sfidojnë njëra-tjetrën për të fituar terren për trafikimin e emigrantëve dhe substancave narkotike.
Deri më tani, mbi 700 familje janë zhvendosur afër kufirit me Guatemalën, ndërsa raportohen edhe viktima nga përleshjet e grupimeve kriminale.
Turqia dhe Irani bien dakord se duhet të ulen tensionet në Lindjen e Mesme
Ngjarjet në Gaza kanë shtuar frikën për një destabilizim të gjendjes në Lindjen e Mesme, andaj, presindenti turk, Recep Tayyip Erdogan dhe homologu i tij në Iran, Ebrahim Raidis, në një takim, kanë rënë dakord se duhet të merren hapa konkretë për shmangien e një konflikti më të gjerë.
Turqia është vendi që ka kritikuar shpeshherë ashpër Izraelin për sulmet e tmerrshme në Gaza, të cilat nuk kanë kursyer as civilët. Erdogan është shprehur i gatshëm të kontribuojë në rindërtimin e Gazës dhe ka bërë thirrje të shpeshta për armëpushim, ndërsa kryeministri izraelit nuk i ka pranuar thirrjet dhe ka vijuar me ofensivën në Gaza.
Numri i viktimave i ka kaluar 25,000 dhe Gaza po pëson një krizë të thellë humanitare.
Qipro/ 60 emigrantë sirianë shpëtohen, pasi kishin ngecur prej 6 ditësh në det
Të paktën 4 persona janë shtruar në spital, pasi policia e Qipros, përmes një operacioni, ka shpëtuar 60 emigrantë sirianë, të ngecur në det, 55 km larg ishullit.
Emigrantët, prej 6 ditësh kishin ngecur në det dhe gjendja e disa prej tyre ishte e rëndë. Policia dhe helikopterët ushtarakë shoqëruan në spital 3 fëmijë dhe 1 person të rritur, për të marrë ndihmën e duhur mjekësore.
Mijëra njerëz në Gaza ngecin në spitale për shkak të sulmeve izraelite
Mijëra qytetarë të Gazës kanë ngecur në spitalet e zonës Khan Younis, pasi janë bllokuar nga sulmet e njëpasnjëshme izraelite. Edhe pse një delegacion nga Hamasi u drejtua në Egjipt për raundin e fundit të bisedimeve, duke synuar një tjetër armëpushim për lirimin e pengjeve nga të dyja palët, sërish Izraeli s’i ka ndalur sulmet e shumta.
Një luftë e ashpër është zhvilluar në spitalet kryesore në Khan Younis, duke e bërë shumë të vështirë ikjen e civilëve, të cilët rrezikojnë humbjen e jetës.
