Semi Jaupaj, përmes një postimi në Instagram, tregoi se ka humbur peshë dhe na rikujtoi se nuk është mirë që një personi t’i vihen në dukje ndryshimet me peshën, qoftë humbja apo fitimi i kilogramëve.

“Semi, je dobësuar shumë”. Këto janë streçet e mia të preferuara dhe më rrinë shumë të lira tani. P.S.: Duhet të rrinë të ngushta, që të të mbledhin. Kjo ishte për të thënë që e di që jam dobësuar; minimumi e shoh te rrobat që më rrinë të mëdha. Ndonjëherë, ndodh pa dëshirë lëvizja e peshës, kështu që nuk është mirë të vihet aq shumë në dukje si për “je e dobët”, ashtu edhe për “je e shëndoshë”. Thënë kjo, mua nuk më bezdis të jem e dobët”, tha këngëtarja.

Nisur nga komentet mbi peshën e Semit, pse është mirë të heqim dorë nga fjalia “sa je dobësuar”?

Nëse sheh se një prej miqve/të afërmve ka humbur peshë, me siguri ti do t’ia thuash se ka ndryshuar dhe duket shumë mirë. Ti mund t’ia shprehësh me shumë çiltërsi dhe me sinqeritet të plotë, në trajtën e një komplimenti, por duhet ta dish se çfarë është kompliment për ty, mund të ketë pasoja të tjera te miqtë/të afërmit.

Duke i thënë dikujt se është dobësuar, vazhdon të konfirmosh atë që shoqëria idealizon si “të bukur”, duke e marrë të mirëqenë se disa kilogramë më pak të bëjnë automatikisht më tërheqës/e dhe të bukur. Sipas ekspertëve, njerëzit duhet të tregohen shumë të kujdesshëm kur bëjnë komente në lidhje me pamjen e jashtme dhe veçanërisht për peshën.

Kjo, sepse pa e ditur, mund ta përkeqësosh situatën e njerëzve që ka probleme me çrregullimin e ushqimeve dhe vakteve, ose probleme me pranimin e imazhit të trupit. Duke thënë “sa je dobësuar” e bën personin tjetër të mendojë se është dukur jo dhe aq bukur më parë. Në njëfarë mënyre, e bën të ndihet një person i gjykuar për pamjen e jashtme.

Si të veprosh?

Gjej të tjera mënyra për ta komplimentuar personin tjetër, të cilat nuk përfshijnë komente që lidhen direkt me trupin. Nëse dikujt i është dashur të humbasë peshë për arsye shëndetësore, mund ta komplimentosh duke i thënë se është veshur në mënyrë elegante ose se i shkon shumë një ngjyrë specifike.

Tingëllon paksa klishé, por është shumë e rëndësishme të pranojmë trupat tanë dhe faktin që jemi unikë. Është e pamundur të refuzosh gjenet. Sa më shpejt ta bëjmë këtë, aq më të shëndetshëm do të dukemi nga brenda dhe jashtë.