Alice Munro, autoria kanadeze që nisi të shkruajë histori të shkurtra sepse mendonte se nuk kishte as kohë e as talent për të shkruar me mjeshtëri romanet, dhe më pas i dedikoi një karrierë të gjatë pikërisht historive psikologjike që zaptuan botën, ka ndërruar jetë në moshën 92-vjeçare.
Ajo la gjurmë në historinë e letërsisë për mënyrën e veçantë të të shkruarit dhe me talentin e saj arriti të fitojë çmimin Nobel në Letërsi. Familjarët e saj dhe zëdhënës të shtëpisë së publikimit të veprave të saj konfirmuan vdekjen në një azil ne veri të Torontos.
Shëndeti i Munro-s kishte nisur të kishte probleme prej vitit 2009 kur bëri bypass në zemër dhe luftoi me kancerin, por nuk hoqi dorë nga shkrimi.
Ajo bënte pjesë në linjën e artistëve si Katherine Anne Porter dhe Raymond Carver, të cilët e krijuan reputacionin e tyre në një nga nën degët më të vështira të letërsisë, me histori të shkurtra.
Tregimet e saj më së shumti silleshin rreth grave në periudha të caktuara të jetës, të cilat kalonin nëpër dëshira komplekse dhe analizonte jetën e tyre në formë natyrale. Munro ishte ndër të paktat autore të cilat i kanë trajtuar shkrimet me barazi duke bërë bashkë njerëz të zakonshëm në tema të jashtëzakonshme.
Tregimet e saj zunë rrënjë në memorien e shumë brezave dhe akoma tërheqin lexues të rinj. Në vitin 2013, në moshën 82-vjeçare, ajo u vlerësua me Nobel, për 14 koleksionet e saj me histori, pasi juria iu referua si “mjeshtre e shkrimit të historive të shkurtra moderne”.
Një nga koleksionet e saj më të njohura është “Dance of the Happy Shades”, publikuar në 1968-ën dhe fitues i shumë çmimeve. Alice Munro ka qenë frymëzim për një brez të tërë shkrimtarësh.
Munro lindi në vitin 1931 në Wingham, Ontario. Shumë prej tregimeve të saj vendosen në zonën ku jetoi, kulturën dhe mënyrën e jetesës së rajonit. Tregimet e saj janë krahasuar shpesh me ato të Anton Chekhov, për aftësinë dhe dhembshurinë e shkrimit të tyre.
Artikuj të sugjeruar:
