Jessica Biel do të ndërgjegjësojë sa më shumë prindër dhe njerëz në çdo cep të botës që të flasin hapur për ciklin menstrual. Aktorja ka botuar së fundmi librin e saj, “A kids book about periods” dhe me këtë synon të ndihmojë prindërit që ta fillojnë sa më herët këtë bisedë me fëmijët, që ndonjëherë duket e vështirë, por në fakt është një mënyrë që ata të kuptojnë se si funksionojnë trupat e tyre, duke normalizuar gjithashtu edhe të folurit për një temë që shpesh konsiderohet tabu: menstruacionet.
Së bashku me zgjedhjen për të edukuar njerëzit rreth menstruacioneve përmes librit të saj, aktorja e famshme shpreson të ndalojë ndjesinë e turpit sa herë që flitet për këtë aspekt, diçka që ajo e ka përjetuar vetë.
Ndjenjat e frikës dhe turpit lindën kur Jessica përjetoi ciklin e parë menstrual në moshën 11-vjeçare, gjatë një mëngjesi kur po perfomonte në një shfaqje shkolle. Një histori që ajo e ka shpërndarë edhe në Instagram.
“Isha i frikësuar,” kujton ajo. “Mendova se po vdisja. Çfarë po më ndodhte? Unë isha vërtet e trembur.”
Si nënë e dy djemve, Biel ka menduar se si të hapë bisedën për periodat me ta, veçanërisht me djalin 9-vjeçar, diçka që shërbeu edhe si motivim për të shkruar librin. "Unë kam djem, ndaj shpesh mendohem se si do e flas me ta këtë çështje," thotë ajo. “Nuk dua të njëjtën ndjesi si ajo që përjetova unë kur pata menstruacionet e para. Djemtë e mi duhet ta dinë se nuk ka gjë të shëmtuar, frikë apo ndjesi të çuditshme në këtë cikël natyral që u ndodh femrave,” shton ajo.
Për Biel, është e rëndësishme që djemtë e saj të dinë detaje për menstruacionet edhe pse kjo nuk ndikon drejtpërdrejt tek ata.
“Nëse nuk e kanë atë informacion, nuk do të jenë në gjendje të përgjigjen me dhembshuri ndaj gocave që e përjetojnë këtë fazë.” “Unë dua që djemtë e mi të kenë njohuri dhe të përfshihen në biseda sa herë flitet për periodat.”
Nisur nga shembulli personal, aktorja inkurajon sa më shumë prindër që ta bëjnë këtë gjë dhe të nisin bisedat e sinqerta me djemtë dhe vajzat rreth ciklit menstrual.
Artikuj të sugjeruar:
Burimi: Glamour
