Tërmeti në Indonezi: Një djalë 5-vjeçar nxirret nga rrënojat pas dy ditësh
Shiu dhe rreziku i rrëshqitjeve të tokës ndërprenë punën e punonjësve të shpëtimit që kërkonin për të mbijetuarin nën rrënoja, pas tërmetit që vrau 271 njerëz. Ndërkohë që kërkimet vazhdonin, ekipet e shpëtimit nxorrën nga rrënojat një djalë pesëvjeçar, i cili kishte shpëtuar sepse mbrohej nga një dyshek.
Në një video, vogëlushi Azka, i cili kishte mbetur i bllokuar për dy ditë, u shfaq i vetëdijshëm dhe i qetë.
Kosova dhe Serbia zgjidhin mosmarrëveshjen e targave
Liderët e Serbisë dhe Kosovës arritën një marrëveshje për t'i dhënë fund tensionit për targat, sipas kryediplomatit të Bashkimit Europian. “Ne kemi arritur një marrëveshje,” tha përfaqësuesi i lartë i BE-së për punët e jashtme, Josep Borrell në një postim në Twitter.
Tensionet e fundit ndërmjet dy palëve kanë të bëjë me planin e Kosovës për të filluar gjobitjen e mijëra shoferëve që aktualisht kanë targa të Serbisë. Borrell tha se Serbia ra dakord të ndalonte lëshimin e targave me emërtimin e qyteteve të Kosovës në to, ndërkohë që Kosova do të "ndalonte veprimet e mëtejshme në lidhje me riregjistrimin e automjeteve".
Kriza energjetike e Europës do të jetë “edhe më e keqe” dimrin e ardhshëm nëse nuk përfundon lufta në Ukrainë
Nëse lufta e Rusisë në Ukrainë nuk përfundon deri dimrin e ardhshëm, problemet energjetike të Europës do të përkeqësohen në mënyrë dramatike, ka paralajmëruar Paolo Gentiloni, Komisioneri Europian për Ekonominë.
Pasiguria do të rëndojë shumë mbi ekonominë e kontinentit ndërkohë që Europa përpiqet të dalë nga kriza energjetike dhe inflacioni rekord. "Sipas parashikimit tonë, ne mund të fillojmë rimëkëmbjen në mesin e vitit 2023 dhe mund të kemi ulje të inflacionit në gjysmën e dytë të 2023," tha Gentiloni për Euronews.
Ukraina pa energji elektrike: BE kërkon që shtetet të dërgojnë gjeneratorë
Qyteteve europiane iu kërkua të dërgonin gjeneratorë rezervë në Ukrainë për të ndihmuar vendin gjatë dimrit përballë sulmeve të Rusisë ndaj infrastrukturës së energjisë elektrike. Rrjeti energjetik i Ukrainës u bombardua sërish pasi presidentja e Parlamentit Europian, Roberta Metsola, kërkoi që të dërgoheshin gjeneratorë në Ukrainë.
