UNICEF ngre alarmin për gjendjen e fëmijëve në Liban

Sulmet mes grupit militant Hezbollah dhe Izraelit që janë kryer në jug të Libanit, kanë përkeqësuar situatën në vend, duke detyruar të mitur dhe të rinj që të punojnë për t’i mbijetuar urisë.

Sulmet ajrore të Izraelit kanë vështirësuar jetën e banorëve, të cilët edhe më parë janë përballur me kushte të rënda jetese. Numri i fëmijëve që punojnë është në rritje, ndërsa disa familje dërgojnë edhe fëmijët e tyre shumë të vegjël (edhe në moshën 4 vjeç) që të punojnë për mbijetesë.

UNICEF ngriti alarmin, pasi shumë fëmijë janë të kequshqyer, vuajnë nga ankthi dhe nuk po jetojnë dot fëmijërinë e tyre.

OKB i bën thirrje Izraelit të mos sulmojë jugun e Gazës

Shefi i OKB, Antonio Guterres, i ka bërë edhe një herë thirrje Izraelit që të mos vijojë me ofensivën në Rafah. Thirrja e Guterres erdhi pasi kryeministri i Izraelit, Benjamin Netanyahu, u shpreh se do ta pushtojë Rafah, edhe nëse arrihet një marrëveshje me Hamasin për lirimin e pengjeve.

 “Një operacion ushtarak në Rafah do të ishte një përshkallëzim i madh, duke vrarë mijëra civilë të tjerë dhe duke detyruar qindra mijëra të tjerë të largohen”, tha Guterres, duke shtuar se do të kishte një ndikim shkatërrues ndaj palestinezëve, duke sjellë pasoja serioze edhe në Bregun Perëndimor dhe në Lindjen e Mesme.

SHBA/ Vriten 4 policë në Karolinën e Veriut

Katër policë janë vrarë gjatë një shkëmbimi zjarri në Karolinën e Veriut. Sipas burimeve, edhe 4 të tjerë mbetën të plagosur në po të njëjtin operacion. Shkëmbimi i zjarrit mes policisë dhe një personi në kërkim zgjati rreth 3 orë. Ishte vetë i kërkuari që hapi zjarr në oborrin e shtëpisë së tij, por policia e neutralizoi. Më pas, nga brenda shtëpisë, një tjetër person qëlloi me armë në drejtim të policëve.

Një prej policëve u gjet i vdekur në oborr. Ai dhe 3 viktimat e tjera ishin pjesë e një grupi të posaçëm të sherifëve federalë, të cilët po kryenin një operacion për të kapur një person të akuzuar për armëmbajtje pa leje.

Afganistan/ 7 të vrarë nga një sulm në xhami

Shtatë njerëz janë vrarë nga një sulm vdekjeprurës në një xhami në Herat, Afganistan. Sipas Abdul Mateen Qani, zëdhënës i Ministrisë së Brendshme, një person qëlloi mbi besimtarët në xhami, rreth orës 21:00.

Imami i xhamisë, një fëmijë dhe 5 besimtarë të rritur ndërruan jetë si pasojë e sulmeve. Sipas zyrtarëve, ishin 3 persona ata që organizuan sulmin. Vëllai i imamit të ndjerë tha se imami ishte në mes të lutjes kur ndodhi tragjedia.