Bota

Lajme në pak minuta: Çfarë po ndodh në botë

Shkruar nga Anabel

26 Prill 2024

Lajme në pak minuta: Çfarë po ndodh në botë

Shemben krahët e ndërtesës ikonike në Francë

Lajme në pak minuta: Çfarë po ndodh në botë

Një ndër ndërtesat ikonike në Paris ka ndryshuar në mënyrë të beftë. Krahët “Moulin Rouge”, ndërtesës së njohur për kabarenë ikonike, janë shkëputur gjatë mbrëmjes, pa lënduar ndokënd. Menjëherë nisën punimet për rregullimin e saj.

Një ndër banorët e lagjes ku ndodhet “Mulliri i Kuq”, u shpreh: “Është një simbol i Montmartrë, i fshatit të tij, i stilit bohemian të jetesës së Parisit. E gjithë bota vjen për t’u fotografuar pranë Mullirit të Kuq. Për momentin do ta bëjnë këtë pa krahët unikë, por mendoj se pronarët do të bëjnë maksimumin për t’i instaluar sërish ata sa më shpejt”. Deri më tani, nuk është zbuluar arsyeja e shkëputjes së krahëve, por dyshohet se ishte një problem teknik.

Lukashenko thotë se nëse Rusia i përgjigjet Perëndimit me armë bërthamore, do të ndodhë apokalipsi

Lajme në pak minuta: Çfarë po ndodh në botë

Lideri bjellorus, Alexander Lukashenko, një një deklaratë të dhënë së fundmi, ka folur për rrezikun e incidenteve ushtarake në kufi me Ukrainën. Ai theksoi se këto incidente kanë rrezikshmëri të lartë dhe nëse Rusia përdor armë bërthamore për të marrë hak ndaj ndihmës që Perëndimi po i jep Ukrainës, do të ndodhë një “apokalips”.

Nga ana tjetër, ai tha se Bjellorusia ka zhvendosur ca batalione të gatshme për luftë nga rajoni Vitebsk, në kufi me pjesën perëndimore të Rusisë. Ndërkohë, thuhet se mund të nisin diskutimet për vendosjen e paqes mes Ukrainës dhe Rusisë. Sipas Lukashenko-s, tekstet paraprake që po diskutohen mes zyrtarëve rusë dhe ukrainas, mund të shërbejnë si fillesë për negociatat e paqes.

OKB thotë se 282 milionë njerëz u përballën me urinë akute gjatë vitit 2023

Lajme në pak minuta: Çfarë po ndodh në botë

Gati 282 milionë njerëz nga 59 vende të ndryshme të botës, u përballën me urinë akute në vitin 2023. Në shtimin e këtij numri ndikoi shumë edhe lufta në Rripin e Gazës, i cili është territori më i madh i njerëzve që vuajnë nga uria.

Në vitin 2023, numri i njerëzve që u përballën me urinë akute, u rrit me 24 milionë, krahasuar me vitin e mëparshëm. OKB thotë se ka rritur numrin e vendeve në të cilat monitoron furnizimin me ushqime, ndërsa Sekretari i Përgjithshëm i OKB-së, Antonio Guterres, u shpreh në hyrje të raportit se shifrat në të përfaqësojnë një “thirrje për dështimet e njerëzimit”, duke shtuar se një një botë me bollëk, fëmijët janë duke vdekur nga uria.

Nigeri/ Të burgosurit arratisen pas përmbytjes së burgut

Lajme në pak minuta: Çfarë po ndodh në botë

118 të burgosur u arratisën nga burgu “Suleja”, afër Abuja-s, kryeqytetit të Nigerisë, pasi burgu u godit nga një përmbytje, si pasojë e shirave të dendur, të cilët dëmtuan godinën e burgut.

Zëdhënësi i burgut deklaroi se policia po kërkon me intesitet të arratisurit dhe se deri më tani janë kapur 10 prej tyre. Megjithëse nuk dihet identiteti i njerëzve që përfituan nga kaosi në burg për t’u arratisur, pretendohet se mund të jenë disa nga anëtarët e grupit famëkeq Boko Haram, të cilët edhe më parë ishin burgosur në të njëjtin burg.