23 prilli ishte Dita Botërore e librit, ditë e zgjedhur në mënyrë simbolike nga UNESCO për botën e literaturës. Librat kanë ndikim të jashtëzakonshëm në formimin e njeriut dhe shpesh shërbejnë si guidë për sukses. I pyetur për librin që rekomandon, Presidenti i Grupit BALFIN, Samir Mane, një prej sipërmarrësve më të sukseshëm në Ballkanin Perëndimor thotë se librat kanë ndikuar te ai për të krijuar një model të suksesshëm biznesi.

“Kryesisht lexoj libra biznesi, menaxhimi, libra mbi të rejat në fushën financiare, biografi të njerëzve të suksesshëm, thotë Mane. Madje nxjerr shënime prej tyre gjithçka që më vlen për biznesin. Herë pas here librat që më pëlqejnë i hedh në rrjetet e mia sociale duke i rekomanduar. Do të rekomandoja “Winning” nga Jack Welch, ish CEO i General Electric. Është një guidë shumë e mirë mbi strategjitë e biznesit, kulturën e kompanive dhe vendimet që e bëjnë një kompani të suksesshme. Ajo ide që kisha para 30 vitesh ishte më shumë se një ëndërr, -thotë ai. Isha rreth 20 vjeç dhe mora një vendim të guximshëm do thoja për moshën dhe për kohën.

I guximshëm pasi tregtia ishte në hapat e saj të parë dhe unë dija shumë pak. Para 30 vitesh as nuk e kisha menduar kurrë që do isha këtu ku jam sot. Nëse do kthehesha edhe një herë pas mbase disa gjëra do i kisha bërë ndryshe por s’do kisha mësuar dot nga gabimet. Kështu që nuk do doja të bëja asgjë ndryshe”- përfundon Samir Mane.