Kenia/ Rrëzohet avioni ushtarak, duke shkaktuar 5 viktima
Një helikopter ushtarak është rrëzuar në Kenia, duke shkaktuar 5 viktima. Pesë ushtarët e ndjerë ishin duke udhëtuar në Kenian perëndimore. Në bordin e helikopterit ndodheshin edhe 3 njerëz të tjerë, të cilët mbijetuan.
Informacioni mbi rrëzimin e avionit, apo identitetit të ushtarëve është i paplotë, ndërsa zëdhënësi i qeverisë, Isaac Mëuara, ka njoftuar se shumë shpejt do të jepet një deklaratë sqaruese mbi ngjarjen e ndodhur.
Suedia miraton ligjin për ndërrimin e gjinisë në moshën 16-vjeçare
Parlamenti suedez miratoi ligjin që ul moshën në të cilën njerëzit mund të ndërrojnë gjininë. Tanimë, personat mbi 16 vjeç do të mund të ndryshojnë gjininë, pas vendimit që u miratua në parlament me 234 vota pro dhe 94 kundër. Më parë, mosha ishte 18 vjeç.
Ndonëse Suedia ka qenë vendi i parë që legjitimoi tranzicionin gjinor, qysh prej vitit 1972, ligji i ri ka ngjallur polemika. Disa persona thonë se ky është një ligj që ka bërë një ndryshim rrënjësor, ndërsa kritikët shprehen se nevojiten më shumë kërkime. Ligji do të hyjë në fuqi në korrik të vitit 2025. Procesi do të jetë më i thjeshtë dhe suedezët që duan të ndërrojnë gjininë do të bëjnë një konsultë me një mjek e psikolog, do të marrin miratimin nga Bordi Kombëtar i Shëndetit dhe Mirëqenies dhe kështu do të mund të kenë një identitet të ri gjinor.
Gjermani/ Arrestohen 2 persona me akuzën e spiunazhit
Dy persona gjermano-rusë janë arrestuar në Gjermani, pasi dyshohen për spiunazh. Një prej tyre akuzohet se ka dakordësuar të kryejë sulme ndaj caqeve potenciale, duke përfshirë edhe ndërtesat amerikane, me qëllim që të sabotohet ndihma për ukrainën. Të dyshuarit, Dieter S. dhe Alexander J., u arrestuan ditën e mërkurë në Bavari.
Sipas prokurorëve, Dieter S. kishte folur për akte të mundshme sabotuese me një person që ishte lidhur me inteligjencën ruse. Komunikimi kishte nisur që nga tetori dhe roli i Dieter ishte që të kontribuonte në minimin e mbështetjes që Gjermania po i jep Ukrainës. Dieter kishte rënë dakord që të kryente sulme me bomba dhe të vinte zjarre të qëllimshme në infrastrukturat që përdor ushtria në ndërtesat industriale në Gjermani.
Joe Biden i bën thirrje Dhomës së Përfaqësuesve: “Miratoni ndihmën për Ukrainën dhe Izraelin”
Presidenti amerikan, Joe Biden, i bëri thirrje Dhomës së Përfaqësuesve që të aprovojë ndihmën për Ukrainën dhe Izraelin. Ukraina, prej rreth 3 vitesh është në luftë me Rusinë, e cila e sulmoi pa një provokim nga ana e Ukrainës, ndërsa Izraeli, vijon ofensivën në Gaza, kundër Hamasit, qysh prej tetorit 2023.
“Dhoma (e Përfaqësuesve) duhet ta miratojë paketën këtë javë dhe Senati duhet ta bëjë votimin menjëherë pas saj,” tha ai, pasi Dhoma e Përfaqësuesve njoftoi se këtë javë do të votojë për vendimin e dërgimit të paketave të ndihmës. “Izraeli po përballet me sulme të paprecedentë nga Irani dhe Ukraina po përballet me bombardime të vazhdueshme nga Rusia, të cilat janë intensifikuar në mënyrë dramatike muajin e fundit”, u shpreh Biden.
