Dubai ka përjetuar reshjet më të dendura në 75 vitet e fundit dhe kanë rënë më shumë se 142 mm shi për një ditë. Qendrat tregtare, autostradat dhe aeroportet u përmbytën, duke bërë që avionët të uleshin mbi ujë. Linja e fluturimit “EgyptAir” pezulloi fluturimet midis Kajros dhe Dubait derisa të përmirësohen kushtet.

Shirat e dendur përshkuan gjithë Emiratet e Bashkuara Arabe dhe ndërprenë fluturimet. Pamjet nga aeroporti ndërkombëtar i Dubait treguan pamjet e panikut dhe të kalimit të pasagjerëve nëpër ujëra të rrëmbyeshëm, ndërsa rrugët e qytetit u kthyen në “lumenj”, me makina që dukeshin shumë pak mbi ujë. Ndër të tjera, një burrë 70-vjeçar humbi jetën.

Shirat nisën që të hënën mbrëma dhe nuk u ndalën deri të martën. Ato ranë edhe mbi shkretëtirën e Dubait. Shirat prekën territoret e Bahrein, Omanit, Katarit dhe Arabinë Saudite, por veçanërisht Emiratet e Bashkuara.

Pse situata doli jashtë kontrollit?

Në një vit, reshjet mesatare kapin shifrat e 94.7 mm, ndërsa këtë vit, ndërsa nga dita e hënë, kanë rënë më shumë se 142 mm shi. Disa raporte thonë se shirat mund të jenë përkeqësuar nga mbingarkesa e reve, një praktikë e zakonshme në Emiratet e Bashkuara, e cila përdoret për të siguruar shi në territoret e thata. Metoda përkon me lëshimin e grimcave të kripës në ajër, duke përdorur zakonisht avionë. Kripa e çliruar në operacionet e mbingarkimit/mbjelljes së reve ndihmon në formimin e pikave të ujit, duke rritur kështu mundësinë e shiut. Sidoqoftë, Qendra Kombëtare e Meteorologjisë (NCM), e cila mbikëqyr këtë operacion, tha se para episodit të reshjeve, nuk është kryer asnjë praktikë e mbingarkimit të reve.

Omar Al Yazeedi, zëvendësdrejtori i përgjithshëm i NCM tha:

“Ne nuk u angazhuam në asnjë operacion të mbingarkimit të reve gjatë kësaj ngjarjeje të veçantë të motit. Thelbi i mbingarkimit (mbjelljes) së reve, qëndron në “mbushjen” e reve në fazë më të hershme, para reshjeve. Angazhimi në aktivitete të tilla gjatë një stuhie do të ishte i kotë”.

Kjo u mbështet edhe nga profesori i fizikës dhe dinamikës atmosferike në universitetin e Reading, Maarten Ambaum, i cili u shpreh: “Praktika ndodh zakonisht në retë që nuk prodhojnë shi. Normalisht, nuk do të zhvillohet një stuhi shumë e fortë sa kjo”.

Shiu është i pazakontë në Emiratet e Bashkuara Arabe, por ndodh periodikisht gjatë muajve më të ftohtë të dimrit. Është e çuditshme që në prill, të ndodhë një stuhi kaq e madhe sa të shkaktojë përmbytje shtëpish, të braktisen makinat dhe rrugët, si dhe të ketë mungesë të kullimit të sistemit të reshjeve. Qendra tregtare kryesore, duke përmendur edhe “Dubai Mall” dhe “Mall of the Emirates” patën përmbytje të shumta dhe në metronë e Dubait, uji kaloi lartësinë e kyçeve të këmbëve. Rufetë pushtuan qiellin dhe prekën edhe majën e Burj Khalifa, ndërtesës më të lartë në botë.

Ndikimi i njeriut

Një ndër ndikimet kryesore në një situatë të tillë, të pazakontë, është sigurisht, dora e njeriut. Përkeqësimi i klimës, i shkaktuar nga faktori njerëzor po akumulon motin ekstrem në të gjithë botën, duke shkaktuar fatkeqësi më të shpeshta dhe vdekjeprurëse, duke nisur që nga valët ekstreme të të nxehtit, zjarret e mëdha dhe deri te përmbytjet. Në dekadën e fundit, kanë ndodhur një sërë ngjarjesh që do të kishin qenë të pamundura, nëse nuk do të ishte shpejtuar me ritme të jashtëzakonshme ngrohja globale.

Reshjet ekstreme janë më të zakonshme dhe më intensive, për shkak të ndryshimeve klimatike të shkaktuar nga njerëzit në pjesën më të madhe të botës. Kjo ndodh për shkak se ajri më i ngrohtë mund të mbajë më shumë avuj uji. Sipas profesorit të universitetit të Reading, bota duhet të përgatitet për të tilla ngjarje ekstreme të motit. “Ne kemi thënë prej disa dekadash se në një klimë në ndryshim, ndoshta do të kemi më shumë nga këto lloj ngjarjesh të rënda. Kjo po ndodh vërtet”, u shpreh ai.