Blinken tur në Europë, fokusi tek Ukraina
Sekretari i Shtetit të SHBA-së, Antony Blinken, po udhëton drejt Europës për takime urgjente me zyrtarë të BE-së dhe NATO-s për Ukrainën, në vazhdën e rikthimit të Donald Trump në Shtëpinë e Bardhë.
Sekretari i Shtetit i SHBA-së do të kryejë bisedime në Bruksel të mërkurën për mënyrat e forcimit të mbështetjes për Ukrainën, duke parashikuar një ndryshim në politikën e jashtme të SHBA-së pas kalimit të pushtetit te presidenti i zgjedhur Trump.
Trump ka dearuar më parë se do të reduktojë ndihmën ushtarake për Ukrainën pasi të marrë detyrën, si pjesë e një pikëpamjeje të përgjithshme për një qasje “Amerika së pari” në politikën e jashtme.
Kur Presidenti ukrainas Volodymyr Zelenskyy vizitoi SHBA-në për të promovuar planin e tij të “fitores” në shtator, Trump e përshkroi vendin si “të shkatërruar”.
OKB ngre alarmin: Asnjë vend nuk është i sigurt në Gaza
Situata humanitare në Rripin e Gazës mbetet kritike dhe mund të përkeqësohet më tej, paralajmëron Agjencia e Kombeve të Bashkuara për Ndihmën dhe Punët e Palestinezëve (UNRWA).
Drejtori i çështjeve të UNRWA-s në Gaza, Scott Anderson, duke folur për Euronews në Bruksel, kërkoi që të gjitha palët e konfliktit të respektojnë shenjtërinë e vendeve të sigurta për civilët.
“Nuk ka asnjë vend të sigurt në Gaza. Përfshirë zonat e konsideruara të sigurta. Dhe fatkeqësisht, të gjitha palët e konfliktit nuk po respektojnë shenjtërinë e vendeve që duhet të jenë të sigurta për civilët, përfshirë spitalet dhe shkollat,” tha Anderson.
Ai theksoi se si objektet e UNRWA-s, ashtu edhe shkollat palestineze, janë bërë objektiv, duke apeluar për mbrojtjen e këtyre vendndodhjeve që civilët të mund të gjejnë siguri për veten dhe familjet e tyre.
Gjermani, presidenti miraton datën e zgjedhjeve të parakohshme
Presidenti gjerman Frank-Walter Steinmeier miratoi kalendarin e vendosur bashkërisht nga grupet parlamentare të Partisë Social Demokrate (SPD), të Gjelbrit dhe Partisë Kristian Demokratike (CDU) për të mbajtur zgjedhje të parakohshme më 23 shkurt 2025.
“Sipas vlerësimit aktual, presidenti federal e konsideron datën 23 shkurt 2025 si një datë reale për zgjedhje”, tha zyra presidenciale në një deklaratë pas takimit me Steinmeier me krerët e koalicionit Rolf Mützenich (SPD), Friedrich Merz (CDU/CSU) dhe Britta Hasselmann dhe Katarina Drogues (të Gjelbërit).
Kushtetuta gjermane parashikon që presidenti federal ka fuqinë të shpërndajë parlamentin dhe të thërrasë zgjedhjet.
Dështimi i koalicionit solli paqëndrueshmëri politike në Gjermani duke çuar në këtë vendim.
Spanja përgatitet për të tjera stuhi, njerëzit në panik
Një muaj pas katastrofës fatale të klimës që goditi Spanjën, njerëzit e prekur nga përmbytjet përgatiten për stuhi të reja, ndërsa pasojat politike të ngjarjes vazhdojnë të shkaktojnë trazira.
Në mes të paralajmërimeve të reja për stuhi, mediat lokale raportuan se Mbreti Felipe VI do të kthehet së shpejti në vendin e përmbytjeve të papritura, pas vizitës së tij të mëparshme, ku u përball me fyerje dhe sulme me baltë dhe vezë nga protestuesit, si pasojë e zemërimit lokal për përgatitjen dhe reagimin e dobët të autoriteteve.
Mbi 100,000 protestues dolën në rrugë gjatë fundjavës, dhe kanë bërë thirrje për dorëheqjen e liderëve të qeverive lokale të krahut të djathtë, të cilët i akuzojnë se injoruan paralajmërimet dhe nuk ndërmorën hapat e duhur për menaxhimin e situatës. Një protestë e mëtejshme u mbajt gjithashtu në Barcelona të martën.
