Francë/ Ekstremi i djathtë fiton raundin e parë të zgjedhjeve

Partia e ekstremit të djathtë të Marine Le Pen u shpall fituese e raundit të parë të zgjedhjeve. Partia siguroi një fitore të bindshme, por ende jovendimtare. Raundi i dytë i votimit do të jetë më 7 korrik. Ndërkohë, vetë Le Pen ka shpallur fitoren e partisë, duke thënë se “populli francez ka folur”.

Partia e saj  fitoi 34.2% të votave; Fronti i Ri Popullor (e majta ekstreme) 29.1% dhe ajo e Macron, 21.5% të votave. Në fund ishin konservatorët e Les Républicans, të cilët morën 10% të votave.

New York/ Një djalë 13 vjeç vritet nga policia

Oficerët e policisë kanë qëlluar për vdekje një djalë 13-vjeçar, pasi arrestuan atë dhe një person përputheshin me përshkrimet e dy të dyshuarve, që ishin në kërkim për grabitje në Utica. Ndërsa u morën në pyetje djemtë, 13-vjeçari tentoi të arratisej.

Shefi i policisë, Mark Williams, u shpreh se policia vuri re diçka që dukej si “pistoletë” dhe e përplasi djalin përtokë. Pas një përplasjeje të shkurtër, oficeri e qëlloi në gjoks me armë djalin.

Ndonëse mori ndihmën e parë, sërish adoleshenti nuk ia doli të mbijetonte dhe ndërroi jetë në spital. Menjëherë ngjarja solli reagime publike, pasi komuniteti vendas sulmoi shefin e policisë për vrasjen e një minoreni, çka detyroi policinë që të publikonte pamjet.

Irani thotë se do t’i hapë luftë Izraelit, nëse ky i fundit sulmon Libanin

Irani ka paralajmëruar Izraelin se do të përballet me të, nëse sulmon Libanin. Kjo deklaratë ka rritur frikën për çekuilibrimin e situatës në Lindjen e Mesme, ku ka konflikte të ndezura, si ai i Gazës dhe lufta e vazhdueshme mes grupimit terrorist, Hezbollah dhe Izraelit. Hezbollah mbështetet nga Irani dhe qysh prej fillimit të luftës në Gaza, më 7 tetor 2023, grupimi dhe Izraeli kanë sulmuar njëri-tjetrin.

Ushtria izraelite është shprehur se janë miratuar planet për një ofensivë në Liban dhe kanë nxitur Hezbollahun të kundërpërgjigjet. Grupimi ka thënë se asnjë pjesë e Izraelit nuk do të kursehet dhe se kjo do të sjellë një konflikt të plotë.

Greqi/ Moti i nxehtë shkakton vatra të ndryshme zjarri

Greqia është përfshirë nga moti ekstrem dhe kanë nisur vatrat e zjarreve. Më 30 qershor, ka rënë një zjarr i madh në Athinë dhe pritet që situata të përkeqësohet edhe më shumë gjatë verës. Greqia është duke u përballur me kushte shumë të nxehta atmosferike dhe temperaturat kanë shkuar deri në 44 gradë Celsius.

Zjarri në Athinë i është afruar shtëpive të banorëve, pasi është ndihmuar edhe nga erërat e forta. Mediat kanë raportuar se tre shtëpi janë djegur plotësisht dhe se në misionet e shpëtimit janë aktivizuar 140 zjarrfikës, tetë helikopterë dhe nëntë avionë.

Ndërkohë, u është bërë thirrje banorëve që të evakuohen dhe të shkojnë në zona të tjera, më të sigurta.