Zgjedhjet në veri të Kosovës/ BE shpreh keqardhjen për thirrjet për bojkotim të zgjedhjeve
BE ka shprehur keqardhje për thirrjen që ka bërë Lista Serbe për bojkotimin e zgjedhjeve në veriun e Kosovës. Katër shqiptarë janë vendosur në katër komuna në veriun e Kosovës, i cili shumicën e banorëve e ka me nënshtetësi serbe dhe Lista Serbe kërkon pikërisht shkarkimin e tyre.
“Ne jemi në dijeni të shqetësimeve të shprehura nga serbët e Kosovës lidhur me procesin për zgjedhjet e reja. Përkundër kësaj, ne i bëjmë thirrje Listës Serbe të rishqyrtojë vendimin për të mos marrë pjesë, pasi demokracia nënkupton pjesëmarrje dhe realizimin e të drejtës për serbët e Kosovës që të shprehin qëndrimet e tyre në kutitë e votimeve”, thuhet në përgjigjen e BE-së.
Kretë/ Nisin zjarret në ishullin grek
Ishulli i Kretës është përfshirë nga zjarret në fundjavë, rreth një muaj para nisjes së sezonit zyrtar të plazhit dhe turizmit. Të paktën 70 zjarre kanë shpërthyer në mbarë ishullin, duke detyruar dhjetëra njerëz të lënë banesat e tyre.
Gjendja e rënduar raportohet sidomos në Mavros, në Lasithi. Ende nuk dihet nëse ka zjarre të qëllimshme apo që ndizen si pasojë e kushteve natyrore, ndërsa një burrë u arrestua pasditen e 7 prillit, për zjarrvënie të qëllimshme.
Mozambik/ Përmbyset trageti duke shkaktuar 94 viktima
94 njerëz, mes tyre dhe fëmijë, kanë ndërruar jetë pasi një traget u përmbys në brigjet e Mozambikut. 26 persona të tjerë raportohen të zhdukur. Trageti ishte një anije peshkimi e mbingarkuar dhe nuk ishte e licensuar për transportin e njerëzve.
Varka po transportonte njerëz nga Lunga në provincën Nampula në ishullin e Mozambikut. Raportet fillestare bëjnë me dije se trageti u përmbys pasi u godit nga një valë e lartë batice, ndërsa sipas Jaime Leto, sekretar i shtetit në provincën Nampula, njerëzit ndodheshin në traget dhe synonin të largoheshin që të shpëtonin nga kolera.
Zyrtari i Iranit paralajmëron Izraelin: “Ambasadat tuaja nuk janë të sigurta”
Gjenerali Rahim Safavi, i cili është këshilltar ushtarak i liderit suprem të Iranit, Ayatollah Ali Khamenei, paralajmëroi Izraelin se asnjë prej ambasadave të shtetit nuk është më e sigurt, pas sulmit të dyshuar në Damask, për të cilin u fajësua ushtria izraelite.
Tensionet rajonale janë rritur duke kërcënuar zgjerimin e konfliktit në Lindjen e Mesme, teksa lufta mes Izraelit dhe Hamasit hyri në muajin e shtatë të dielën. Komenti i gjeneralit nënkupton se Irani po planifikon hakmarrjen, ndërsa Izraeli ka shtuar mbrojtjen ajrore.
