Franca hedh hapin e parë drejt legalizimit të ndihmës për vetëvrasje mjekësore
Dhoma e ulët e parlamentit francez ka miratuar një projektligj që lejon të rriturit me sëmundje të pashërueshme të marrin medikamente vdekjeprurëse. Ky është një hap kyç në një debat të gjatë që ka përfshirë jo vetëm Francën, por edhe vende të tjera europiane.
Projektligji parashikon që ndihma për t’i dhënë fund jetës të jetë e mundur vetëm në kushte të caktuara, ku personi duhet të jetë në gjendje ta administrojë vetë medikamentin. Në raste të rralla, ku kjo nuk është e mundur fizikisht, ndihma mund të jepet nga një mjek ose infermier.
Turqia ofrohet të presë raundin e ardhshëm të negociatave Ukrainë-Rusi
Ministri i Jashtëm turk, Hakan Fidan, deklaroi se Turqia është e gatshme të organizojë një raund të ardhshëm negociatash mes Ukrainës dhe Rusisë, duke shprehur se mund të çojnë në një armëpushim të shpejtë dhe paqe të qëndrueshme.
"Ne jemi gjithmonë të gatshëm të presim bisedimet. E shohim këtë si një detyrë jo vetëm për rajonin tonë, por për paqen globale", tha Fidan gjatë një konference për shtyp me homologun e tij rus, Sergey Lavrov.
Ai shtoi se Turqia ka përcjellë kërkesën që negociatat të mbahen në territorin e saj. Fidan ndodhet për një vizitë dyditore në Moskë, ku u takua edhe me presidentin rus Vladimir Putin.
BE përgatit paketën e 18-të të sanksioneve ndaj Rusisë, pavarësisht mungesës së mbështetjes nga SHBA
Bashkimi Europian po përgatit një paketë të re sanksionesh kundër Rusisë, në përpjekje për të rritur presionin ndaj presidentit, Vladimir Putin, që të pranojë një armëpushim të pakushtëzuar 30-ditor në Ukrainë. Megjithatë, plani po has në rezistencë të fortë nga Hungaria dhe mungesë koordinimi me Shtetet e Bashkuara.
Presidentja e Komisionit Europian, Ursula von der Leyen, deklaroi se paketa e 18-të do të përmbajë sanksione më të ashpra, përfshirë ashpërsimin e kufirit të çmimit për naftën ruse, një masë që do të jetë vështirë të realizohet pa përfshirjen e SHBA-së.
Gjermania paralajmëron Izraelin për mbështetjen ushtarake, për shkak të krizës në Gaza
Gjermania ka shprehur shqetësim serioz për situatën humanitare në Rripin e Gazës dhe ka kërcënuar se do të ndërmarrë masa kundër Izraelit, duke përfshirë ndalimin e furnizimit me armë që mund të përdoren në mënyrë të paligjshme.
Ministri i Jashtëm gjerman, Johann Wadephul, deklaroi se mbështetja historike e Gjermanisë për Izraelin nuk duhet të shfrytëzohet për të justifikuar konfliktin aktual.
"Tani ndodhemi në një pikë ku duhet të mendojmë me shumë kujdes për hapat e ardhshëm", tha ai për transmetuesin WDR, pa dhënë detaje të tjera.
