Kryeministri i Kosovës, Albin Kurti, ishte shënjestra e një atentati nga “persona që mund të bëjnë pjesë në ekstremin serbo-maqedonas”, raportuan burime pranë Radiotelevizionit publik të Kosovës.
“Ka qenë një kombinacion operativ serb, ku janë gërshetuar mashtrimet mediale me veprimet në terren nga atentatorë të mundshëm të ekstremit serbo-maqedonas, të afërt me Federatën Ruse, por nën kontrollin e institucioneve serbe”, është shprehur burimi.
Ndërkohë, vetë Albin Kurti u shpreh se nuk është ndjerë i kërcënuar nga një plan i mundshëm për atentat, megjithëse ndërkohë që zhvillohej mbledhja në Shkup, ka parë forca të shumta policore. Ai shtoi se ka mësuar që ka pasur kërcënime nga individë e struktura të ndryshme që i kanë “rrënjët” në Beograd.
“Sa erdha nga Shkupi, nuk jam ndjerë i rrezikuar, por kam parë që kishte shumë forca policore që u kujdesen për këtë mbledhje që e mbajtëm e ku mysafiri special ishte përfaqësuesi i SPD-së gjermane, Lars Klingbeil”, tha Kurti, pasi kreu homazhe për ish-aktivistët Mon Balaj dhe Arben Xheladini, të cilët humbën jetën në protestën e vitit 2007 në Prishtinë.
Burime nga institucionet e sigurisë në Kosovë u shprehën për televizionin kombëtar kosovar se: “Menjëherë pas mbledhjes, kanë siguruar të dhëna se nga Serbia ka pasur përpjekje për të vrarë kryeministrin e Republikës së Kosovës, Albin Kurtin, i cili ka qëndruar në Shkup”.
Ndërkohë, Maqedonia e Veriut nuk e ka pranuar se ka pasur një tentativë për atentat. Zyrtari i ministrisë së Punëve të Brendshme në Maqedoninë e Veriut, Toni Angellovski deklaroi se nuk ka pasur asnjë tentativë për atentat ndaj Albin Kurtit në Shkup.
Megjithatë, perimetri ku u krye mbledhja dhe ku qëndroi Albin Kurti ka rritur masat e sigurisë, për të garantuar paprekshmërinë e kryeministrit dhe delegacionit.
