Gaza/ Hamasi pranon planin e armëpushimit, por kërkon ca ndryshime

Hamasi i është përgjigjur thirrjes së SHBA dhe vendeve të tjera që i kërkuan grupimit të pranonte planin e hartuar për përfundimin e luftës në Gaza. Grupimi i shpallur terrorist, ka pranuar planin, por kërkon ca ndryshime, të cilat do të shqyrtohen.

Ministrat e Jashtëm të vendeve që po funksionojnë si ndërmjetëse, Katarit dhe Egjiptit, konfirmuan se e kanë marrë një përgjigje nga Hamasi dhe janë në vlerësim e sipër. Ndryshimet në marrëveshje përkojnë me armëpushimin, tërheqjen e trupave izraelite, shkëmbimin e të burgosurve dhe rindërtimin e vendit. Gjithsesi, ata kanë kërkuar edhe garanci me shkrim nga SHBA, për shkak se i druhen mosrespektimit të marrëveshjes nga ana e Izraelit.

Ballkani goditet nga vala e nxehtësisë

Ballkani është goditur nga vala e të nxehtit dhe temperaturat do të kalojnë 40 gradë Celsius. Kulmi i vapës do të arrijë në Greqi, saktësisht në Peloponezin Lindor, ku temperatura do të shkojë 43 gradë Celsius.

Ndërsa në Bullgari e Rumani, po ndodh një tjetër fenomen: rrymat e ngrohta përplasen me ato të ftohtat, duke krijuar stuhi. Në Spanjë, një nivel i lartë reshjesh u regjistrua dhe qeveria u detyrua të mbyllë përkohësisht aeroportin.

Kuvajt/ 41 viktima nga zjarri në një ndërtesë

41 persona kanë humbur jetën në një ndërtesë që përdorej për strehimin e punëtorëve në qytetin Magaf. Një zjarr shpërtheu në godinë, rreth orës 6:00 të mëngjesit me orën lokale.

Policia bëri me dije se dhjetëra persona u shpëtuan, por tha se godina ka një mbipopullim në akomodimin e punëtorëve, duke mos dhënë detaje për nënshtetësinë apo llojin e punës që bënin personat e vdekur apo të lënduar. Ndërkohë, edhe Ministria e Shëndetësisë shprehu keqardhje për rastin dhe tha se 43 persona ishin duke marrë ndihmë në spital.

Macron pas shpërndarjes së kabinetin: “Unë mendoj vetëm për Francën”

Emmanuel Macron ka reaguar, pasi shpërndau parlamentin dhe çoi Francën në zgjedhje të parakohshme, të cilat do të mbahen më 30 qershor. Ai shprehet se është i vendosur që të fitojë zgjedhjet kundrejt partisë së ekstremit të djathtë të Marine Le Pen.

Macron mohoi akuzat se shpërndarja e parlamentit mund t’i japë një pushtet më të madh politik ekstremit të djathtë: “Unë po mendoj vetëm për Francën. Ishte një vendim i mirë dhe në interes të vendit. U them francezëve: “Mos kini frikë, shkoni dhe votoni”, tha ai, duke shtuar se e ka dëgjuar popullin e tij dhe se tanimë është koha për qartësim. “Shpërbërja e parlamentit është gjesti më i qartë, radikal dhe i fortë. Është një gjest i madh besimi te populli francez”, shtoi ai.